Is-Segretarjat Parlamentari għar-Riċerka u l-Innovazzjoni, b’kollaborazzjoni mal-Università ta’ Malta, nieda uffiċjalment esebizzjoni ġdida, li se tkun qed tagħti ħajja lis-settur marittimu, waqt konferenza tal-aħbarijiet fiċ-ċentru għax-xjenza interattiva l-Esplora.
Din il-wirja, li ġġib l-isem ‘Dive-In’, qed issir possibbli grazzi għal teknoloġija ġdida li tinkludi ologrammi b’figuri ta’ bosta ħut u annimali marittimi, kif ukoll robot interattiv.
Dan l-investiment, li għalih ġew allokati mal-€50,000, qed isir bil-għan li jitkabbar l-għarfien fl-ekosistemi tal-baħar, waqt se jgħin biex jitkompla jikber l-interess fl-istess ċentru għax-xjenza interattiva. B’hekk, l-Esplora jibqa’ x-xempju ta’ suċċess tal-avvanzi xjentifiċi li qed iseħħu f’pajjiżna.
Il-Kap tal-Esplora, Olaf McKay, spjega x’wieħed jista’ jara f’din l-esebizzjoni permanenti.
Qal, “Ninsabu tassew kuntenti hawnhekk fl-Esplora, għax issa għandna din l-esebizzjoni permanenti fejn ħa tittratta r-riċerka marittima flimkien mat-teknoloġija. Hawnhekk se jsibu issa wkoll ologramma li ħa turi l-ispeċi tal-baħar kif ukoll robot interattiv li jismu ‘Pepper’, li tassew se jkun popolari mat-tfal, adulti, familji, li se jiġu jżuruna hawnhekk fl-Esplora.”
F’isem l-Università ta’ Malta, il-Professur Alan Deidun qal li din il-wirja hi l-ewwel pass biex Malta jkollha l-ewwel esebizzjoni tal-baħar, wara ż-żewġ esebizzjonijiet li hemm fil-gżira Għawdxija.
Żied jgħid li Malta tagħmel parti mill-alleanza SEA-EU, li tinkludi disa’ universitajiet min-Norveġja sal-Mediterran, bil-għan li jittelgħu aktar programmi, riċerka u avveniment kulturali bejniethom.
F’kumment lil ONE News, il-Professur Deidun saħaq kemm hu importanti li l-pubbliku jeduka ruħu dwar il-konservazzjoni tal-baħar.
Qal, “Ħafna mill-poplu Malti ma jaf kważi xejn dwar il-baħar, jiġifieri anke fil-ġenerazzjonijiet iż-żgħar anke sempliċiment isem tal-ħut bil-Malti lanqas jafu x’inhuma, jiġifieri lanqas jieklu ħut, pereżempju. Allura, hemm bżonn kbir tal-għarfien, għax kif għedt anke jiena llum waqt il-preżentazzjoni tiegħi, inti ma tistax tipproteġi xi ħaġa li ma tifhimx u ma tapprezzax. Jiġifieri l-ewwel irridu nrawmu l-aprezzament fil-qlub tan-nies li l-baħar hu lil hinn min-naqra veduta, minn forsi mort inxarrab naqra saqajja fis-sajf.”
Is-Segretarju Parlamentari għaż-Żgħażagħ, ir-Riċerka, u l-Innovazzjoni, Keith Azzopardi Tanti spjega li din il-wirja hi parti minn sensiela ta’ proġetti għall-qasam marittimu f’pajjiżna.
Qal, “Dan hu biċċa minn sensiela ta’ proġetti fejn tidħol riċerka fil-marittimu, imma anke dan l-istess proġett dak li rajna llum hu wieħed min-numru ta’ esebiti hawnhekk. Aħna fl-Esplora rridu nagħtu esperjenza differenti, esperjenza aħjar, nerġa’ ngħid għall-istudenti, għat-tfal tagħna, kif ukoll għal ma min jiġi, mal-ġenituri, gwardjani, nanniet, eċċ.”
