L-istaġun ta’ Żigużajg 2023-2024 qed jirritorna bi programm komprensiv imfassal apposta biex jinvolvi u jaspira lit-tfal u lill-udjenza żagħżugħa, permezz ta’ firxa wiesa’ ta’ attivitajiet artistiċi, li jinkludu mużika, film, teatru, xjenzi u aktar.
Il-Ministru għall-Wirt Nazzjonali, l-Arti u l-Gvern Lokali, Owen Bonnici, enfasizza kif l-istaġun il-ġdid, li se jinkludi l-isforzi kollaborattivi ta’ persuni kreattivi lokali u internazzjonali, iqanqal sens ta’ skop u apprezzament għas-sbuħija inerenti f’kull persuna.
L-għan aħħari hu li jinħolqu individwi mħejjija b’mod ħolistiku li jikkontribwixxu b’mod pożittiv għal diversi komunitajiet u li jiċċelebrawhom.
B’għażla kkurata ta’ għaxar proġetti minn ħames forom ta’ arti distinti, l-istaġun ta’ Żigużajg iservi ta’ vetrina għat-talenti ta’ aktar minn 35 artist ta’ suċċess.
Min-naħa tiegħu, id-Direttur Artistiku ta’ Spazju Kreattiv, Daniel Azzopardi, enfasizza bis-sħiħ l-impenn biex tiġi inkorporata arti kreattiva fil-qalb ta’ ħajjet in-nies u qal li l-Istaġun ŻiguŻajg ta’ din is-sena jiżgura esperjenza distintiva u rikka għat-tfal u l-familji tagħhom.
Għal aktar tagħrif, wieħed jista’ jżur is-sit uffiċjali ta’ Żigużajg fuq www.ziguzajg.org.
