Bejn il-Ġimgħa u s-Sibt, għall-ħames sena konsekutiva se tkun qed titella’ l-fiera ‘I Choose – Nagħżel il-Karriera Tiegħi’.
Din il-fiera se tkun qed tiġbor taħt saqaf wieħed l-istituzzjonijiet u entitajiet edukattivi post-sekondarji kif ukoll karreri minn setturi varji taħt saqaf wieħed. Din il-fiera hija opportunità eċċellenti biex l-istudenti jattendu għal dan l-avveniment u jiksbu għarfien li għandhom bżonn dwar korsijiet differenti li jistgħu jsegwu wara l-edukazzjoni obligatorja. Dan l-avveniment qed isir hekk kif din il-ġimgħa ħarġu r-riżultati tas-SEC, dan bil-għan li jassisti lill-istudenti tal-Form 5 (Sena 11) jevalvaw l-għażliet tagħhom, iffitxu parir u jagħmlu l-għażliet it-tajba.
L-avveniment huwa miftuħ ukoll għal studenti tal-Form 4 (Sena 10) sabiex jibdew jesploraw għażliet u possibilitajiet ta’ karriera u għal kull min jixtieq jikseb informazzjoni dwar it-tipi differenti ta’ edukazzjoni li jwasslu għal karrieri b’mod wiesa’. Il-programm jinkludi preżentazzjonijiet differenti li se jingħataw minn professjonisti f’diversi oqsma relatati biex jattendu kemm l-istudenti kif ukoll il-ġenituri.
Matul dan l-avveniment l-attenzjoni b’mod individwali hi importanti u għaldaqstant se jkun hemm preżenti sessjonijiet ta’ gwida għall-istudenti, wieħed għal wieħed. Għadd ta’ diskussjonijiet interessanti dwar karrieri varji se jitwasslu minn kelliema u minn professjonisti li ġejjin minn setturi privati u oħrajn.
Din il-fiera se tkun miftuħa bejn il-Ġimgħa 19 ta’ Lulju bejn l-4 ta’ wara nofsinhar u sat-8 ta’ wara nofsinhar u s-Sibt 20 ta’ Lulju bejn id-9 ta’ filgħodu sas-2 ta’ waranofsinhar. Din il-fiera se titella’ fil-lukanda Exclesior fil-Furjana. Għal aktar tagħrif wieħed jista’ jżur is-sit elettroniku fuq www.edu.gov.mt/ichoose.
