Ċifri maħruġa mill-Uffiċċju Nazzjonali tal-Istatistika, l-NSO, juru li d-defiċit fuq il-Fond Konsolidat is-sena li għaddiet kien ta’ anqas minn €433 miljun. Dan kien ifisser titjib ta’ €373 miljun fuq id-defiċit irreġistrat is-sena ta’ qabel.
Fi stqarrija, il-Ministeru għal Finanzi qal li r-riżultat tas-sena l-oħra kien l-aħjar riżultat finanzjarju għall-Gvern mill-2019 ’l hawn.
Iċ-ċifri tal-NSO jikkonfermaw li l-Gvern mhux talli laħaq il-miri mħabbra fil-Baġit imma talli mar ħafna aħjar milli kien imbassar.
Fil-fatt id-defiċit tal-Fond Konsolidat għas-sena li għaddiet suppost kellu jkun €909 miljun. Dan it-titjib seħħ għaliex id-dħul tal-Gvern is-sena li għaddiet kien ferm akbar milli kien imbassar. Tant li minflok il-Gvern daħħal €7,188 miljun, id-dħul kien ta’ €7,860 miljun.
L-akbar sors tat-titjib fid-dħul tal-Gvern kien l-income tax. Fil-fatt is-sena li għaddiet il-Gvern irnexxielu jiġbor għall-ewwel darba madwar €3.4 biljun mill-income tax, jew kważi biljun ewro aktar mis-sena preċedenti. Fl-istess ħin żdied bil-bosta d-dħul mill-VAT u mill-bolla. Dan huwa konferma ta’ kemm l-ekonomija Maltija kibret is-sena li għaddiet. Tant li l-prodott dometiku gross laħaq il-figura rekord ta’ €22.5 biljun.
It-titjib qawwi fil-finanzi tal-Gvern seħħ minkejja l-fatt li fl-2024 kellna rekord ta’ spiża kapitali, li laħqet il-figura ta’ €1.1 biljun, jew 14% aktar mill-2023. Il-parti kbira ta’ din iż-żieda kienet biex tissaħħaħ is-sistema tad-distribuzzjoni tal-enerġija f’pajjiżna. Fl-istess ħin is-sena li għaddiet kien hemm żidiet qawwija ħafna fil-benefiċċji soċjali, b’żieda ta’ €168 miljun kif ukoll fil-kundizzjonijiet tal-ħaddiema tas-servizz pubbliku, b’żieda ta’ €216 miljun. Il-Gvern kellu wkoll spiża straordinarja ta’ €106 miljun biex pajjiżna jkollu linja nazzjonali tal-ajru.
Minħabba li d-defiċit fuq il-Fond Konsolidat kien anqas minn dak previst, il-Gvern kellu bżonn jissellef anqas milli pjanat u l-piż tad-dejn tal-Gvern baqa’ f’livelli simili għal dawk tal-2023.
