It-Tlieta filgħodu tħabbret it-tieni edizzjoni tal-Istrina Crowdfunding li permezz tagħha se jinġabru l-flus għall-Malta Community Chest Fund.
Ħabbar dan il-President ta’ Malta George Vella waqt konferenza tal-aħbarijiet.
Fil-fatt il-President Vella tenna kif il-pandemija kienet ta’ xkiel kbir għall-Malta Community Chest Fund sabiex tkompli tiġbor il-fondi biex tkopri l-ispejjeż li parti kbira minnhom hija marbuta max-xiri tal-mediċini għall-kanċer.
Hawnhekk il-President tenna kif f’xahar, il-Malta Community Chest Fund tonfoq madwar miljun u nofs ewro f’mediċini biss. Biex b’hekk din titla’ għal madwar €13-il miljun fis-sena.
Dwar dan il-President spjega kif il-mediċini żdiedu fil-prezz drastikament tant li sitt snin ilu biss, jiġifieri fl-2015, kienu jiswew biss mal-miljun ewro fis-sena.
Il-President Vella stqarr: “L-ispejjeż qed jgħolew speċjalment fejn jidħlu l-mediċini tal-kanċer però ma nistgħux naqtgħu qalbna. Nafu li hemm barra hemm nies li sfortunatament huma milqutin minn ċertu mard u anke minn ċertu kundizzjonijiet li għandhom bżonn u għandhom jingħatalhom l-għajnuna u allura l-MCCF huma kommessi li jagħmlu dan.”
Din it-tieni crowdfunding se tkun qed tinkludi l-parteċipazzjoni ta’ bosta negozji u gruppi, kollha bil-metodi tagħhom ta’ kif jiġbru l-flus għal dan l-għan nobbli.
Il-President sostna: “Il-crowdfunding huwa wieħed mir-raġunijiet u huwa metodu kif wieħed jista’ jdur ma din is-sistema li inti bla ma trid meta tkun qed tixtri prodott jew tieħu servizz u tħallas xi ħaġa żgħira, dak l-ammont ma jaffetwakx wisq lilek però meta dawk meta jinġabru kollha flimkien, bl-għeluf u l-għexieren ta’ eluf ta’ min jixtri u ta’ min jieħu servizzi jagħmlulek somma mhux ħażin.”
Għal aktar informazzjoni u anke biex tingħata donazzjoni wieħed jista’ jaċċessa s-sit www.strinacrowdfunding.mt
