Fl-2003, il-Malta Drydocks u Malta Shipbuilding ġew magħluqa u minflokhom twaqqfet il-Malta Shipyards. Dan wassal biex 900 ħaddiem sfaw mneħħija mill-impjieg tagħhom, u offruti skemi ta’ rtirar kmieni jew trasferiment lejn il-kumpanija Industrial Projects and Services Limited.
Saħaq dan il-kandidat Laburista għall-Elezzjoni tal-Parlament Ewropew Jesmond Marshall.
Huwa saħaq li minn dawn id-900 ħaddiem, 430 għażlu li jieħdu l-iskema tal-irtirar kmieni, filwaqt li 480 ħaddiem għażlu li jiġu trasferiti mal-I.P.S.L. Fl-2003, il-General Workers’ Union f’isem dawn il-ħaddiema ex Tarznari, irreferiet il-każ quddiem it-Tribunal tax-Xogħol. Matul dawn l-aħħar għoxrin sena, tliet każi biss ġew deċiżi: tnejn minnhom kienu ta’ ħaddiema li ffirmaw full and final settlement meta ħadu l-iskema t’rtirar kmieni, u għalhekk tilfu l-każ. L-ieħor kien ta’ ħaddiem li kien ġie trasferit mal-I.P.S.L. u li rebaħ il-każ.
Fl-2014 bdew jinstemgħu żewġ każijiet oħra, iżda sal-lum għadu m’hemmx konklużjoni tagħhom. Dan juri n-nuqqas ta’ ħeffa tal-Qorti Maltija fil-każijiet fejn huma involuti ħaddiema li jfittxu ġustizzja. Barra minn hekk, waqt is-smiegħ tat-Tribunal tax-Xogħol taħt ġurament fil-Qorti, diversi managers ċahdu li kienu għamlu xi assessment tal-Ħaddiema. Dan jikkonferma dak li dejjem kont moralment konvint minnu, jigifieri, li l-għazliet tal-Ħaddiema saru skond fehma politika jew jekk kienux attivisti tal-Union.
Fit-30 t’ April, Il-Ministru Michael Falzon ħabbar li ser isir ġustizzja għall-ħaddiema li marru l-qorti għoxrin sena ilu. Dan huwa frott tal-ħidma li għamlet il-General Workers’ Union, speċjalment jien bhalha s-Segretarju tat-Taqsima Metal u Kostruzzjoni. Dan il-kumpens huwa wkoll estensjoni tal-kumpens li ngħata lil aktar minn 500 familja ta’ ħaddiema tat-Tarzna li marrdu bl-asbestos kif ukoll estensjoni ta’ diversi kumpensi oħra li ngħataw Ħaddiema oħra minn diversi setturi oħra ghal inġustizzji li sofrew snin ilu.
Il-Prim Ministru Robert Abela mill-ewwel kien għaraf li t-talba tiegħi f’isem dawn il-ħaddiema kienet ġustifikata u ħadem biex isir din il-ġustizzja. Għalhekk huwa importanti li fit-8 ta’ Ġunju kulħadd joħroġ jivvota biex tkompli ssir aktar ġustizzja mal-ħaddiema li sofrew inġustizzji taħt il-gvernijiet preċedenti.
