Id-Dwana Maltija bħalissa tinsab fil-proċess li tkompli ssaħħaħ it-taqsima fi ħdanha li tiġġieled il-ħasil ta’ flus.
Dan wara analiżi bir-reqqa tal-modi u l-prattiċi differenti użati bil-għan li jinkisru r-Regolamenti dwar il-Kontroll tal-Flus.
Fil-fatt din it-taqsima li twaqqfet fl-2018 se tkun qed iżżid ir-riżors uman biex minn disa’ uffiċjali fi ħdanha issa jkun hemm ħdax.
Dwar dan ONE News tkellem mad-Direttur tad-Dwana, is-Sur Joe Chetcuti hekk kif spjega l-qofol tal-ħidma ta’ din it-taqsima u l-importanza tagħha.
Huwa spjegalna: “It-Taqsima ta’ Kontra l-Ħasil tal-Flus kienet iffukata l-aktar fuq il-fruntiera għaliex aħna xogħolna huwa li bħala aġenzija ewlenija fuq il-fruntiera l-movimenti ewlenin li jsiru fuq il-fruntiera. Però fuq il-fruntiera jsiru wkoll movimenti wkoll ta’ merkanzija. Importazzjonijiet u esportazzjonijiet u jista’ jkun allura u din hija xi ħaġa li narawha tiġri kullimkien fid-dinja li jkun hemm dik li jsejħula trade based money laundering jiġifieri ħasil ta’ flus relatat mal-kummerċ.”
Huwa spjega wkoll kif issa din it-taqsima qed taħdem mill-qrib ma’ taqsimiet oħra sabiex ittejjeb l-operat tagħha. Fost dawn hemm l-FIAU.
Fil-fatt, id-Dipartiment tad-Dwana hu wkoll mgħammar b’sistema fejn, permezz tagħha, it-tagħrif miġbur ikun mgħoddi fil-pront b’mod elektroniku lill-FIAU u lill-Pulizija biex dawn ikollhom għad-dispożizzjoni tagħhom ċifri u tendenzi ta’ individwi, pajjiżi u ġurisdizzjonijiet oħra ta’ riskju notevoli li jkunu qed jiġu mgħassa.
Tenna wkoll li din it-taqsima qed taħdem mill-qrib mat-taqsima tal-klieb fi ħdan id-dwana li twaqqfet ftit taż-żmien ilu.
Is-Sur Chetcuti sostna: “L-iskwadra kompliet tissaħħaħ billi waqqafna unit oħra separata minnha għaliex mhux tagħmel xogħol esklussivament fuq money laundering biss imma wkoll. It-taqsima tal-klieb fejn hemmhekk introduċejna l-klieb fejn hemmhekk huma trenjati biex ixommu tabakk, droga imma anki flus u hemmhekk allura l-iskwadra tat-taqsima tal-money laundering issaħħet għaliex kellha issa s-sapport tal-klieb ukoll.”
Bejn l-elfejn u sittax u s-sena l-oħra, id-Dwana qabdet żewġ miljun u erba’ mitt elf ewro fi flus kontanti mhux iddikjarati. Dan flimkien ma’ qabdiet rekord ta’ tunnellati ta’ droga, b’valur fit-triq li jlaħħaq aktar minn mija u disgħa u sebgħin miljun ewro.
