Il-Ministru għall-Ġustizzja u Riforma tas-settur tal-Kostruzzjoni, Dr Jonathan Attard ressaq abbozz ta’ liġi intiż li jemenda l-Att dwar l-Estradizzjoni. Dan l-abbozz ta’ liġi, li kien diskuss fil-Parlament fl-istadju tat-tieni qari, huwa kkonsidrat bħala pass sinifikanti lejn it-titjib tal-protezzjonijiet legali fi proċeduri ta’ estradizzjoni.
L-għanijiet u r-raġunijiet ta’ dan l-abbozz ta’ liġi huma li jintroduċu s-salvagwardji għall-volontarjetà tal-kunsens għall-estradizzjoni fl-istadji inizjali tal-proċeduri ta’ estradizzjoni sa livell komparabbli ma’ dak diġà garantit fi proċeduri ta’ estradizzjoni li jsiru wara l-mandati ta’ arrest Ewropew.
Fost il-bidliet ewlenin li dan l-abbozz ta’ liġi se jġib, hemm inkluż ir-rekwiżit li l-Qorti twissi lill-individwi dwar il-konsegwenzi legali tar-rieda tagħhom li jiġu estraditi. Iktar minn hekk, individwi li jkunu qed jistennew l-estradizzjoni u li jkunu ddikjaraw ir-rieda tagħhom li jiġu estraditi, issa se jkollhom perjodu ta’ 15-il jum biex jikkontestaw dik id-dikjarazzjoni li jippermettilhom ifittxu l-annullament u jikkontestaw it-talba għall-estradizzjoni.
Din id-dispożizzjoni tirrikonoxxi l-kumplessitajiet tal-każijiet ta’ estradizzjoni, u għandha l-għan li tipproteġi d-drittijiet tal-individwi matul l-istadji inizjali tal-proċess.
Il-Ministru Attard tenna li l-Att dwar l-Estradizzjoni mhux biss iservi bħala strument legali għal Malta, iżda jirrifletti wkoll prinċipji usa ta’ ġustizzja, kooperazzjoni, u drittijiet tal-bniedem li huma essenzjali fid-dinja tal-lum.
