“Dak iż-żmien kont neżisti u issa qed ngħix” – Din kienet id-dikjarazzjoni ta’ Amy Camilleri omm ta’ żewġt itfal, li l-ħajja tagħha nbidlet mil-lejl għan-nhar bis-saħħa ta’ żewġ donaturi tal-kliewi.
Hija spjegat fuq ONE BREAKFAST, li fl-2001 saritilha d-djanjosi li waħda mill-kliewi tagħha ma baqgħetx tiffunzjona u ddeskriviet t-tbatija li jgħaddu minnha pazjenti li jkunu qed jistennew donatur tal-kliewi, fl-okkazzjoni tal-Jum Dinji għall-kliewi.
B’xorti tajba, omm Amy, kienet tagħtha l-kilwa tagħha, liema donazzjoni waslet biex din il-mara setgħet issir omm. Iżda hija spjegat li l-ġisem jinduna li l-kilwa hija foreign body u għalhekk il-kilwa jaf ma tibqax tiffunzjona għal dejjem.
Filfatt, fl-2014, din l-omm saritilha djanjosi li l-kilwa li kienet irċeviet minn għand ommha ma baqgħetx tiffunzjona u għalhekk bdiet tingħata trattament ta’ erba’ sigħat, tlett ijiem fil-ġimgħa. Hija spjegat li fl-aħħar snin hija ma setgħetx tixrob ħafna ilma, ma setgħetx tiekol frott u ħaxix minħabba l-kundizzjoni tagħha. Iżda, Amy, sitt xhur ilu ngħatat ħajja ġdida minn oħtha hekk kif hija rċeviet waħda mill-kliewi tagħha u stqarret li din bidlitilha ħajjitha.
