Il-bidla fil-liġi li tissalvagwardja liż-żwiemel li jiġbdu l-karozzini intlaqgħet tajjeb minn bosta. Dan hekk kif bil-bdil li sar issa l-Karozzini ma jistgħux jiġu misjuqa f’xi triq matul ix-xhur ta’ Lulju u Awwissu bejn 1 p.m. u l-4 p.m., kif ukoll jistgħu biss jintużaw fi ġranet alternattivi.
Dawn ir-regolamenti huma pass ieħor ‘il quddiem fejn jidħol it-trattament xieraq tal-annimali. Dan wara li matul din il-ġimgħa ġew approvati fil-Parlament tibdil fl-att dwar il-ħarsien xieraq tal-annimali, fejn żdiedu il-pieni minimi ta’ min jabbuża minn dawn.
Iċ-Ċermen tal-Animal Welfare, Nevise Borg Caligari saħqet li din il-liġi l-ġdida tilħaq bilanċ bejn il-bżonnijiet tal-kuċċiera li jaqilgħu l-għixien tagħhom mill-karozzini u l-bżonn li ż-żwiemel ikunu protetti.
“Naħseb li din il-miżura lħaqna bilanċ tajjeb sabiex ovjament it-tradizzjoni, l-għixien ta’ dawk il-kuċċiera jibqa’ jsir fis-seħħ pero fl-istess ħin dawk il-ħinijiet koroħ tas-sħana li jaffetwaw lis-saħħa taż-żwiemel, jiġu evitati. Is-Sajf tagħna huwa kiefer u naħseb li dan huwa l-ewwel pass li ż-żwiemel m’għadniex narawhom bħala mezz tat-trasport iżda qiegħdin narawhom bħala annimal li għandu bżonn il-kura u ovjament l-intervent tagħna sabiex il-ħarsien tiegħu, għas-saħħa tiegħu, ikun kopert ukoll.” Qalet Borg Caligari.
L-attivista għad-drittijiet tal-annimali, Moira Delia wkoll saħqet li din il-bidla fil-liġi hija waħda pożittiva u li ilha mixtieqha ħafna mill-attivisti għad-drittijiet tal-annimali.
Delia stqarret, “Iż-żwiemel irridu nħarsu lejhom, inħarsuhom daqs kemm inħarsu l-annimali domestiċi l-oħra. U hekk hemm bżonn. Din hija aħbar pożittiva immens. Din hija xi ħaġa ġdida li forsi jkun hemm min ma jaqbilx ma’ din il-leġislazzjoni iżda l-ewwel u qabel kollox bħala dipartiment tal- ħarsien tal-annimali ħadt gost li ħarsu is-saħħa u l-ħarsien tal- welfare ta’ dawn iż-żwiemel tal-karozzini.”
Filwaqt li qablet li r-regolamenti l-ġodda huma pass kbir il-quddiem favur it-trattament xieraq tal-annimali hija saħqet dwar l-importanza li issa dawn il-liġijiet ikunu infurzati bl-aħjar mod sabiex jilħqu l-potenzjal kollu tagħhom.
