L-Awtorità għall-Ambjent u r-Riżorsi, l-ERA kkonfermat it-tielet sit ta’ bejta ta’ fekruna f’dan l-istaġun. Dan hekk kif fekruna tal-baħar biedet fil-Bajja tar-Ramla l-Ħamra, f’Għawdex.
Fi stqarrija mill-ERA ntqal li din il-bejta ntlemħet is-Sibt filgħodu, waqt ronda minn voluntiera ta’ Nature Trust Malta.
F’din l-istqarrija ntqal li l-uffiċjali tal-ERA bħalissa qed jikkordinaw mal-għaqda mhux governattiva Nature Trust Malta biex iż-żona tiżġura ħarsien lill-bejta.
L-ERA se tkompli tagħti s-sapport tagħha lin-Nature Trust u lill-partijiet interessati rilevanti sabiex tiżġura l-protezzjoni tal-bejta. Intqal li se tinħareġ ukoll Ordni ta’ Konservazzjoni ta’ Emerġenza.
L-Awtorità appellat lill-pubbliku ġenerali sabiex jaġixxi b’mod responsabbli peress li l-istorbju eċċessiv u d-dawl qrib din iż-żona jistgħu jkunu ta’ theddida għall-bajd tal-frieken u kwalunkwe friegħ.
Dan l-istess appell għamlitu fuq il-midja soċjali, il-Ministru għall-Ambjent Miriam Dalli. Hija appellat sabiex dawk li jkunu fuq il-bajja jkunu responsabbli.
F’din l-istqarrija, l-ERA rringrazzjat lill-pubbliku għall-appoġġ u l-kooperazzjoni tiegħu f’sitwazzjonijiet bħal dawn u ħeġġet lill-pubbliku biex immedjatament jirrapporta kwalunkwe osservazzjoni ta’ attività tal-fekruna lill-ERA fuq in-numru 22923500 jew lil Nature Trust fuq 99999505.
Intqal ukoll li hemm bżonn tal-voluntiera min-Nature Trust, f’dan il-perjodu, sabiex jgħinu fil-monitoraġġ u affarijiet oħra marbuta ma’ din il-bejta tal-fekruna.
Dawk li jixtiequ jgħinu jistgħu jibgħatu email fuq turtle.ramla@gmail.com.
Sadanittant, ftit ilu, l-għaqda mhux governattiva, Nature Trust kienet appellat biex persuni li jgawdu l-bajjiet ramlin f’pajjiżna biex ma jħallux ħofor kbar li faċilment ikunu ta’ periklu u anke ostaklu għall-frieħ kollha tal-fkieren li jistgħu jfaqqsu fil-post.
