F’maratona ta’ 12-il siegħa li saret il-Ħadd, l-1 ta’ Settembru, li ġiet imxanndra wkoll fuq l-istazzjon ONE, il-Moviment Ġesù fil-Proxxmu ġabar is-somma rekord ta’ €202,316. Din il-maratona saret bħala parti minn kampanja ta’ ġbir ta’ fondi biex dan l-istess Moviment jgħin missjonijiet fl-Etjopja, fil-Brażil, u fil-Kenja.
Fr Alex Cauchi, id-Direttur tal-Moviment, qal li jinsab emozzjonat bis-somma rekord miġbura u li dawn il-flus se jkomplu jgħinu lil dawk l-aktar fil-bżonn u fejn hemm l-aktar urġenza. Intant żied jgħid li t-telefonati bid-donazzjonijiet baqgħu jidħlu sat-Tnejn filgħodu, u minn qalbu rringrazzja lill-poplu Malti u Għawdxi għall-ġenerożità li wrew mal-Moviment permezz tad-donazzjoni tagħhom.
Il-linji tad-donazzjonijiet għadhom miftuħa, u wieħed jista’ jagħti d-donazzjoni tiegħu permezz ta’ telefonata fuq 51702004 għal donazzjoni ta’ €15, 51802005 għal donazzjoni ta’ €25, u 51902063 għal donazzjoni ta’ €50, jew SMS fuq 50618933 għal donazzjoni ta’ €6.99. Għal donazzjonijiet permezz ta Myaps u BOV mobile, wieħed jista’ jagħmel użu min-numru 79853611.
