Fit-Times of Malta u l-Boston Globe ġew ippubblikati rapporti dettaljati fejn intqal li l-kumpanija Steward Healthcare kienet qed tagħmel kampanja ta’ tfigħ ta’ tajn u allegazzjonijiet foloz fil-konfront tal-eks Deputat Prim Ministru u Ministru għas-Saħħa, Chris Fearne.
Qed jiġi rrapportat li Fearne kien vittma ta’ kampanja organizzata mħallsa minn Steward Healthcare u li fiha ntefqu mas-sitt miljun ewro biex jiġu attakkati dawk meqjusin bħala għedewwa.
Fearne kien wieħed minnhom u biex issirlu l-allegata ħsara għal dan il-għan tqabbdu anke xi kumpanija barranin, inkluż f’Londra.
Is-sajf li għadda kien hemm stejjer b’allegazzjonijiet serji fil-konfront ta’ Fearne u l-uffiċjal għoli fil-Ministeru tiegħu, Carmen Ciantar. Wara investigazzjonijiet tal-Pulizija Maltija, irriżultaw li dawn ma kinux minnhom. Dakinhar kien ġie rapportat ukoll li għaddew xi flus mill-bejgħ tal-passaporti li, imbagħad, irriżultaw bħala foloz.
Aktar minn hekk, ir-rapportaġġ jidħol fid-dettall dwar kwistjonijiet li nqalgħu bejn il-Gvern Malti u Fearne fuq naħa u Steward fuq naħa oħra, partikolarment fl-elfejn wieħed u għoxrin u kif ir-reazzjoni għal dan minn Steward kienet waħda aggressiva.
Jingħad ukoll li kien hemm persuni oħrajn fil-mira ta’ din il-kampanja minn Steward, inkluż impjegat tagħha. Kien allegat li għal dan kollu ntużaw ukoll flus tal-konċessjoni tal-isptarijiet.
Fl-aħħar snin Steward riedet tibdel din il-konċessjoni, iżda l-Gvern insista li l-kumpanija barranija kellha taħdem bil-konċessjoni li kien hemm fis-seħħ.
Ir-rapporti fil-midja saru fuq informazzjoni li waslet għand l-Organized Crime and Corruption Reporting Project, l-OCCRP.
Fearne spiċċa rriżenja mill-kariga ftit tal-ġimgħat ilu wara l-inkjesta tal-Maġistrat Gabriella Vella, li ordnat azzjonijiet fil-konfront tiegħu. Dakinhar il-Prim Ministru Robert Abela kien insista li għandu fidiuċja sħiħa fi Chris Fearne u kien talbu jirrikunsidra l-pożizzjoni.
