- INVESTIGAZZJONI FUQ LIVELL GLOBALI DWAR IL-KAŻ FALCON FUNDS – IL-FOND TA’ “TONIO FENECH”
- IL-ĦIDMA BEJN IL-PULIZIJA MALTIJA U ŻVEDIŻA GĦADHA GĦADDEJJA
Investigazzjoni li bdiet minn Malta u l-Iżvezja u li issa daħlu fiha pajjiżi oħra: Din hi l-investigazzjoni kriminali b’rabta mal-Falcon Funds, il-fond li fost id-diretturi tiegħu hemm l-eks ministru nazzjonalista Tonio Fenech.
Sorsi li tkellmu mal-gazzetta Kullħadd spjegaw kif l-investigazzjoni mill-Pulizija Żvediża intensifikat tant li minn tliet persuni li kienu investigati fil-bidu, issa l-ammont tela’ għal għaxar persuni li b’xi mod jidher li għandhom konnessjoni ma’ dan il-fond. Fond li għadu jiddomina l-aħbarijiet Żvediżi dan hekk kif għadhom ma ġewx irritornati il-biljuni ta’ flus li nsterqu mingħand pensjonanti
Żvediżi wara li t-tfaddil tagħhom għaddew b’mod frodulenti minn fond privat għal fond ta’ Tonio.
Mal-gazzetta Kullħadd intqal li iktar ma iżjed nies qed jispiċċaw taħt investigazzjoni tal-Pulizija, iktar qed jiskopru affarijiet ġodda dwar il-fond. Dan wassal biex il-Pulizija Żvediża titlob l-għajnuna legali fuq livell internazzjonali tant li pajjiżi bħar-Renju Unit u l-Finlandja qed jagħtu l-għajnuna tagħhom f’każ li l-Iżvediżi jirreferu għalih bħala l-Iskandlu Falcon.
“L-involviment ta’ pajjiżi oħra f’din l-investigazzjoni huwa kruċjali dan għaliex il-prosekuzzjoni qed tagħmel minn kollox biex tikseb lura l-flus tal-pensjonanti Żvediżi,” qal is-sors li tkellem mal-gazzetta Kullħadd.
Ma’ Expressen, ġurnal Żvediż, il-prosekutur Żvediż li qed imexxi l-investigazzjoni, Arne Fors kien kwotat jgħid li anke jekk l-investigazzjoni intensifikat u mxiet ’il quddiem qal li kien qiegħed jittama li sa issa l-każ ikun magħluq. Madanakollu dak li xtaq ma seħħx. Qal li l-każ hu wieħed delikat, u l-prosekuzzjoni qed taħdem bla waqfien anke jekk xi drabi tkun limitata mir-riżorsi.
“Irridu l-għajnuna legali minn pajjiżi differenti biex nittraċċaw il-biljuni. Għad fadal xi jsir u rridu nħaffu l-ħidma,” qal Arne Fors ma’ Expressen.
Sa issa, l-investigazzjoni qed tindika li flus il-pensjonanti għaddew f’pajjiżi oħra u dan f’tentattiv li l-biljuni ma jkunux intraċċati. Dan il-ħjiel importanti, żied it-tama għall-Awtorità Żvediża għall-Pensjonijiet li xi darba l-pensjonanti se jaraw xi forma ta’ ħlas.
Ma’ ġurnal Żvediż kelliem għall-Aġenzija qal li fix-xhur li ġejjin il-pensjonanti jistgħu jaraw t-tfaddil tagħhom.
Is-sors li tkellem mal-gazzetta Kullħadd ikkonferma li l-ħidma bejn il-pulizija Żvediża u dik Maltija għadha għaddejja u hemm kollaborazzjoni sħiħa miż-żewġ naħat.
Kien daqs xahar ilu li l-Pulizija Maltija daħlet fl-investigazzjoni dwar il-Falcon Funds. Dan wara li kienet il-Pulizija Żvediża li talbet l-għajnuna tagħha u minn hemm bdiet azzjoni konġunta li flimkien qed jaħdmu biex isibu l-flus ta’ 22 pensjonant li sfaw vittma tal-fond ta’ Tonio.
