Il-fazzjoni ta’ kontra l-Kap Nazzjonalista Adrian Delia fil-Partit Nazzjonalista qed tispara minn kullimkien fi sforz biex tkompli timmina lill-Kap fl-iktar mument dgħajjef tiegħu.
Il-gazzetta Kullħadd żvelat kif fl-aħħar jiem bdiet tiġri x-xniegħa li Adrian Delia offra r-riżenja tiegħu u li kien is-Segretarju Ġenerali Clyde Puli li m’aċċettahiex anke wara direzzjoni u pressjoni f’dan is-sens minn Pierre Portelli, il-Kap Eżekuttiv tal-midja tal-Partit Nazzjonalista u wieħed fost l-eqreb ta’ Adrian Delia.
Imkejjen fil-Partit Nazzjonalista qrib ta’ Simon Busuttil qalu li dan hu minnu u saħansitra tennew li din mhix l-ewwel darba li l-Kap offra li jirriżenja, bl-ewwel okkażjoni kienet f’Novembru li għadda. Iżda, imkejjen viċin Adrian Delia ċaħdu mill-ewwel din l-istorja meta kkuntattjati mill-gazzetta Kullħadd l-Ħamis filgħodu. Qalu li dan hu biss tentattiv ieħor ta’ dawk li ma jridux lill-Kap biex jibqgħu jimminawh.
Interessanti ħafna kif ftit wara li bdiet tiġri din ix-xniegħa, dawk li huma magħrufa bħala parti mill-fazzjoni ta’ Delia bdew itellgħu dikjarazzjonijiet pubbliċi li jappoġġjawh. Fosthom Pierre Portelli nnifsu, il-Viċi Kap David Agius, id-Deputati Kristy Debono u Mario Galea u oħrajn.
Il-Ġimgħa, kien Adrian Delia nnifsu li kiteb status twil li fih indika b’mod ċar li l-attakki kontra tiegħu ġejjin minn ħdan il-Partit Nazzjonalista. Saħansitra rrefera għal dawk li tradewh u dawk li jattakkaw minn ġewwa. Referenza ċara wkoll għal dawk li ma riduhx jagħlaq din is-sena bħala Kap u wieġeb billi qal li se jibqa’ hemm.
Il-kamp ta’ Simon Busuttil irid jiftaħ id-diskussjoni dwar it-tmexxija u għamel din il-kwistjoni ċara Michael Briguglio, li fil-Partit Nazzjonalista daħħlu Simon Busuttil u prova jintgħoġob ma’ Adrian Delia biex iżid iċ-ċans li jkollu suċċess fl-elezzjoni tal-Parlament Ewropew.
Briguglio kellu pressjoni kbira biex jikkummenta minħabba l-assoċjazzjoni tiegħu ma’ nies qrib Occupy Justice u sehem li kellu qabel l-elezzjoni ġenerali li għaddiet. Jirriżulta li kien hemm min bagħat messaġġ li bis-skiet tiegħu Briguglio se jitlef il-ftit kredibbiltà li kien baqagħlu.
Għalhekk Briguglio kiteb. Qal li dejjem osserva l-proċeduri tal-partit, kemm biex ikun kandidat għall-Parlament Ewropew u kif ukoll fil-ħatra tal-kap. Meta hu magħruf li kien qed jappoġġja kandidat ieħor. Iżda, tenna li l-kwistjonijiet li qed idawru lill-Partit Nazzjonalista bħalissa għandhom bżonn deliberazzjoni u diskussjoni li ma jkunux fuq l-internet. Dan għall-ġid tal-partit u tal-Oppożizzjoni, qal Briguglio.
Jidher li ta’ Briguglio hi l-ewwel mossa minn sensiela, li se jitolbu diskuzzjoni interna fi ħdan il-Partit Nazzjonalista. Dan bil-għan li tinfetaħ għalkollox id-diskussjoni dwar it-tmexxija, inkluż fil-Kunsill Ġenerali.
Intant, il-gazzetta Illum ukoll kompliet tiżvela li iridu jqaċċtu lil Delia minn Kap qabel Mejju, izda Delia se jiqba’ żgur. Tliet sorsi fil-Partit Nazzjonalista, tnejn minnhom Deputati Nazzjonalisti u ieħor kandidat tal-Parlament Ewropew, qalu li s-sitwazzjoni fil-Partit Nazzjonalista hija ħazina ħafna.
Tnejn mis-sorsi qalu lill-Illum li qed isiru laqgħat sigrieta li fihom deputati u uffiċjali tal-Partit qed jippjanaw kif Delia se jkun imġiegħel jitneħħa. Is-sors viċin Adrian Delia qal li l-laqgħat qed isiru minn-nies tas-soltu. Imma hu qal li Delia se jiqba’ Kap. Deputat Nazzjonalista li tkellem mal-Illum qal li s-sitwazzjoni fil-Partit Nazzjonalista hija ikkumplikata ħafna u qal li ma jaħsibx li l-Partit jista jistenna aktar għa sejrrien lura flok il quddiem bħalissa.
Deputat Nazzjonalista ieħor qal li ovjament soluzzjoni trid tinsab zgur. Taqta’ fejn taqta’ se joħroġ id-demm , qal lis-stess Deputat Nazzjonalista.
Intant, The Sunday Times qalet li l-President tal-Eżekuttiv tal-Partit Nazzjonalista Mark Anthony Sammut qal li l-eżekuttiv se jiddiskuti l-allegazzjonijiet fil-konfront ta’ Adrian Delia, għalkemm għadu m’hemmx data ta’ meta se ssir din il-laqgħa.
