Il-Gvern se jaħdem biex iġedded is-settur tal-kostruzzjoni u l-iżvilupp tal-bini sabiex ikun hawn kwalità aqwa u aktar sostenibbiltà.
Dan qalu l-Ministru għall-Ippjanjar u x-Xogħlijiet Pubbliċi, Stefan Zrinzo Azzopardi, waqt konferenza tal-aħbarijiet bit-tema ‘Malta – Ċertezza u Stabbiltà’.
“Nemmen li jeħtieġ li sseħħ evoluzzjoni, kif ukoll tiġdid tas-settur tal-kostruzzjoni u l-iżvilupp tal-bini, biex ikollna kwalità, kwalità aqwa, u nwieġbu għal dak li qed jgħidulna n-nies dwar dawn l-oqsma.”
Il-Ministru għall-Ippjanar Stefan Zrinzo Azzopardi
Huwa qal li l-Ministeru li jmexxi għaddej b’ħidma ta’ konsultazzjoni mal-organizazzjoni Maltija ESG Platform. Id-diskussjonijiet qed jiffukaw fuq kif tista’ tintlaħaq l-effiċjenza fl-użu tal-enerġija f’kull binja ġdida u anki f’binjiet li qed jiġu rinnovati.
Il-Ministru Zrinzo Azzopardi qal li l-Awtorità tal-Bini u l-Kostruzzjoni qed tiffinalizza diskussjonijiet, fosthom mal-Kamra tal-Periti, dwar l-ewwel abbozz tal-Kodiċi Nazzjonali tal-Bini, li se jitratta t-twaqqigħ u l-iskavar, fost l-oħrajn.
Huwa ħabbar li wasal biex jintemm il-proċess sabiex jiġu liċenzjati il-kuntratturi kollha li jmissu mal-industrija tal-bini, u li se tiddaħħal leġiżlazzjoni dwar l-iskills card.
Il-Ministru Zrinzo Azzopardi ħabbar li l-Awtorità tal-Ippjanar is-sena d-dieħla se tagħmel xogħol biex tiġi aġġornata l-politika dwar l-estetika, flimkien ma’ miżuri li jħeġġu żvilupp aktar uniformi u li jirrispetta aħjar l-ambjent urban f’pajjiżna.
Il-Ministru qal li, fl-aħħar xhur, id-Development Planning Fund tal-Awtorità tal-Ippjanar beda jwettaq tletin proġett, b’investiment ta’ madwar €40 miljun.
Qal ukoll li, sa Awwissu, kien hemm madwar 1,100 applikazzjoni għal rifużjoni tat-taxxa tal-boll b’rabta max-xiri ta’ proprjetà f’żoni ta’ konservazzjoni urbana.
Il-Ministru Stefan Zrinzo Azzopardi qal li qed javvanza x-xogħol fuq ir-reviżjoni mal-Pjan Strateġiku dwar l-Ambjent u l-Iżvilupp, magħruf bħala SPED, u d-dokumenti se jitressqu għall-konsultazzjoni pubblika s-sena li ġejja.
Dwar l-Awtorità dwar is-Saħħa u s-Sigurtà fuq il-Post tax-Xogħol, spjega li qedjiġu studjati emendi għall-qafas leġiżlattiv li jirregola s-saħħa u s-sigurtà fuq il-post tax-xogħol.
Qal li se jsir investiment ta’ €350,000 għal sistema diġitali mill-Awtorità dwar is-Saħħa u s-Sigurta fuq il-Post tax-Xogħol sabiex tinġabar u tinżamm informazzjoni relatata ma’ spezzjonijiet.
Intant, is-sena d-dieħla, id-Dipartiment tax-Xogħlijiet Pubbliċi se jikkonkludi l-proġett għal spazju miftuħ għall-kunċerti bħala parti mir-riġenerazzjoni u l-estenzjoni tal-Park Nazzjonali f’Ta’ Qali.
Il-Ministru Zrinzo Azzopardi qal li, barra minn dan, se tiġi organizzata mill-ġdid iż-żona eżistenti tas-Suq tal-Bdiewa f’Ta’ Qali u se tiġi rrijabilitata ż-żona tal-pikniks. Dan ix-xogħol se jinkludi afforestazzjoni ġdida u faċilitajiet relatati mal-pikniks. Huwa ħabbar ukoll li se ssir żona għall-ikkampjar.
Intant, id-Dipartiment tax-Xogħlijiet Pubbliċi se jagħmel xogħol ta’ tisbiħ fi Ġnien il-Kunsill f’Birżebbuġa, filwaqt li mistenni jibda x-xogħol ta’ tisbiħ fi Ġnien Indipendenza f’Ħaż-Żebbuġ. Barra minn hekk, se jibdew il-preparamenti biex isiru proġetti ta’ spazji miftuħa ġodda fis-Siġġiewi u f’Ħaż-Żabbar.
Il-Ministru Zrinzo Azzopardi qal ukoll li l-istess Dipartiment se jlesti l-proġett tat-taffija tal-għargħar fiż-Żurrieq, waqt li għaddejjin studji dwar proġetti oħra bl-istess għan fl-Imsida u San Ġwann, fil-Mosta, u anki f’Birżebbuġa.
