B’tifkira tal-200 sena mill-miġja tal-istatwa Titulari ta’ Santa Katarina V.M. fiż-Żurrieq, is-Sezzjoni Żgħażagħ Palmisti fi ħdan is-Soċjetà Mużikali Santa Katarina V.M. A.D. 1864 ser ittella’ serata Mużiko-Letterarja bit-tema 200 SENA SSAĦĦARNA BI ĠMIELEK.
Matul din is-Serata Mużiko-Letterarja ser tkun qed tieħu sehem il-Piccola Banda tas-Soċjetà. Apparti minn hekk ser jkun hemm is-Sur Charles Coleiro li se jgħaddi tagħrif ta’ kif bdiet it-tradizzjoni tal-Vari Titulari f’pajjiżna u s-Sur Joseph Luke Mangion li se jagħti deskrizzjoni ċara ta’ x’ġara 200 sena ilu meta ż-Żrieraq riedu li jkollhom il-vara titulari tagħhom.
Ser ikun hemm ukoll Feature dwar żewġ anniversarji oħra li l-Parroċċa ta’ Santa Katarina V.M. taż-Żurrieq qiedgħa tfakkar din is-sena, jiġifieri l-400 sena minn mindu ġiet Matriċi permezz tat-twaqqif tal-Parroċċa tal-Qrendi u l-125 sena mill-għoti tad-dinjità ta’ Arċipretali.
Din is-serata ser tittella’ nhar is-Sibt 5 ta’ Mejju fil-Każin tal-Banda Santa Katarina V.M. fis-7:30pm. Kulħadd mistieden li jattendi u dħul huwa b’xejn.
