Ir-rebbiegħa tinsab magħna u magħha bdew jidhru wkoll l-ewwel sinjali tal-passa tar-rebbiegħa, b’opportunità mill-isbaħ għall-familji biex joħorġu barra jgawdu ssbuħija tan-natura u t-temp sabiħ.
Fost l-oħrajn f’Manoel Island kien osservat Blonġun Prim, u madwar Malta ġew osservati wkoll speċi oħrajn bħad-Daqquqa tat-Toppu u l-Ħawwief. Beda jidher ukoll l-ewwel tajr tal-priża fosthom il-Bagħdan Aħmar. Fi tmiem il-ġimgħa li għaddiet hekk kif kellna qamar kwinta laħqet ukoll il-qofol tagħha l-passa talborok, b’numru kbir ta’ birdwatchers jinġabru fiċ-Ċirkewwa biex jaraw dawn lgħasafar ipassu tul il-fliegu bejn Malta u Għawdex. Fost l-ispeċi osservati f’ammonti sostanzjali kien hemm il-Brajmla Ħamra, is-Sarsella Ħamra, is-Silfjun, is-Silfjun Ewropew, il-Palettuna, il-Kuluvert tas-Salib u s-Sarsella. Biex ma nsemmux ukoll l-ewwel osservazzjonijiet ta’ rsieset u agretti kif ukoll għasafar talplajja bħal Girwiel, Girwiel Prim, Pispisell u Pluverotti.
Għalkemm il-fliegu jservi bħala rotta speċifika għall-passa ta’ dawn l-ispeċi kollha ta’ papri, hu ta’ importanza partikolari għall-Brajmla Ħamra – għasfur li kważi kważi jista’ jiġi klassifikat bħala fil-periklu ta’ estinzjoni. Fil-fatt, kien proprju minħabba li ammont sostanzjali minn dawn il-papri jkun osservat għaddej minn hawnhekk f’dan iż-żmien tas-sena li din il-medda baħar bejn il-gżejjer ġiet iddikjarata bħala Zona Marittima ta’ Protezzjoni Speċjali (marine Special Protection Area, SPA) u anke bħala l-ewwel Zona Importanti għall-Għasafar (marine Important Bird Area, IBA) tal-Gżejjer Maltin.
Fl-aħħar jiem ukoll, diġà ġew osservati jpassu minn fuq Malta anke numru ta’ Graw (Common Cranes) u Vellerani (Glossy Ibises) li huma speċi inqas komuni.
Dan l-istaġun, imma, jimmarka wkoll il-ftuħ tal-istaġun tal-kaċċa fir-rebbiegħa, li se jiftaħ bejn il-25 ta’ Marzu u l-14 ta’ April. Din is-sena se tkun permessa biss kaċċa għas-Summien minħabba li hemm moratorju fuq il-kaċċa għall-Gamiem.
Fil-ġimgħat li ġejjin, probabbli jintlemħu wkoll ħafna speċi oħra ta’ għasafar ipassi minn fuq Malta u b’xorti tajba nafu naraw ukoll xi speċi rari għal pajjiżna. Għalhekk, jekk issib ftit ħin ħieles, oħroġ fil-kampanja u ara x’tista’ tosserva fis-sema waqt li tapprezza r-rwol importanti li għandha Malta f’dan il-fenomenu sabiħ tal-passa talgħasafar!
