L-investigatur ewlieni fil-kaz ta’ qtil ta’ Daphne Caruana Galizia, l-ispettur Keith Arnaud kompla jippreżenta aktar evidenza kontra n-negozjant Yorgen Fenech, is-suspettat mandant fil-qtil ta’ Daphne Caruana Galizia.
Quddiem il-Maġistrat Rachel Montebello, komplew jinstemgħu r-recordings tal-konversazzjonijiet bejn il-middleman Melvin Theuma, li ngħata l-maħfra presidenzjali, u Yorgen Fenech.
F’recording minnhom, Fenech instema’ jgħid lil Theuma, li l-eks Chief of Staff tal-Prim Ministru Keith Schembri kesaħ meta qallu bil-qtil ta’ Caruana Galizia.
Fl-istess recording jingħad Keith Schembri bagħat lil Kenneth Camilleri jkellem lil Theuma biex l-eżekuturi tad-delitt, l-aħwa Alfred u George Degiorgio u Vince Muscat jingħataw il-pledge.
Fenech jinstema’ jgħid lil Theuma wkoll li Schembri kien qallu li l-Pulizija waslu biex isolvu l-qtil ta’ Caruana Galizia.
F’dan ir-recording apparti Schembri, Fenech semma lill-ex deputat kummissarju Silvio Valletta, li ssir referenza għalih bħala l-oħxon u qal li dan kien kellmu dwar proċess ta’ ġuri fejn jidħlu l-eżekuturi fil-qtil.
Fenech qal li Valletta ma kienx ħabib tiegħu daqs Schembri u ma kienx jafdah daqs kemm kien jafda lil Schembri.
Fl-istess recording, Fenech qal lil Theuma li Vince Muscat il-koħħu kien qed jikxef kollox mal-Pulizija, mhux biss fuq il-każ ta’ Caruana Galizia, inkluż fuq seba’ każijiet ta’ bombi li saru fil-passat. Iżda l-Koħħu ma kienx lest li jikxef dwar il-każ tas-serqa mill-HSBC għax skont Fenech, f’dan il-każ kienu involuti l-kbarat.
Bil-ġurament Theuma qal li Fenech kien jgħidlu li din l-informazzjoni qegħdin jagħtuhielu Schembri u Valletta.
Iżda fi stqarrija Valletta ċaħad b’mod kategorika li għadda xi informazzjoni fuq il-qtil lil terzi. Qal li l-unika informazzjoni li għadda kienet waqt il-qadi ta’ dmirijietu.
Meta mistoqsi mill-Avukat Jason Azzopardi, li qed jidher għall-familja ta’ Caruana Galizia, Melvin Theuma dar fuq Azzopardi u qallu li darba ċempillu u qallu li ried ikellmu fuq każ kbir u li ried jingħata l-proklama. Azzopardi kien qal lil Theuma li qiegħed imsiefer u talbu jitkellem mad-Deputat nazzjonalista Karol Aquilina.
Theuma qal li ċempel lil Azzopardi għax beda jibża’ li qed jittraduh u ma bediex jemmen li l-Koħħu qed jikxef mal-Pulizija. Qal li wara li ċempel lil Azzopardi mar jorqod u ma kellimx lil Aquilina.
Mistoqsi dwar l-eks Prim Ministru, Melvin Theuma qal li Joseph Muscat ma kienx jaf x’għamel Yorgen Fenech.
Theuma qal li meta talab lil Fenech biex ikellem lil Muscat fuq il-pledge tal-ezekutturi, Fenech qallu li dik tkun l-ikbar ġennata u l-agħar ħaġa li jista’ jagħmel.
Fl-stess recording ssir referenza għal diskussjoni li saret fit-torri ta’ Portomaso bejn Fenech u Theuma dwar artiklu ta’ Caruana Galizia li fih qalet li Keith Schembri kien se jmut fi żmien tliet xhur. Hawnhekk, Fenech jinstema’ jgħid li bħal dik jitfagħħha minn fuq għal isfel.
