Il-ġurnal awtorevoli Amerikan, The Wall Street Journal, faħħar ix-xogħol tal-Ewroparlamentari Laburista, Alex Agius Saliba favur li ċ-ċittadini Ewropej jkollhom charger komuni għall-apparat elettroniku tagħhom.
L-artiklu ntitolat ‘A Politician in Malta Forced Apple to Change the iPhone’, tefa’ dawl fuq xogħol Agius Saliba, li kien strumentali biex, sena ilu, l-Unjoni Ewropea għaddiet liġi li tirrikjedi lill-manifatturi ta’ apparat elettroniku ġdid li jkollhom USB-C biex jiċċarġjaw.
Dan l-artiku faħħar l-impenn li ħa l-Ewro Parlamentari Laburista, li wassal biex jħalli effett fuq biljuni ta’ persuni anki lil hinn mill-Unjoni Ewropea li wkoll jkollhom jużaw numru ta’ cables differenti għall-apparat taghħom, li joħloq ammonti kbar ta’ skart elettroniku.
L-artiklu nnota l-influwenza li kellu Agius Saliba fl-Unjoni Ewropea, hekk kif intqal li l-elezzjonijiet fl-iżgħar stat membru tal-Unjoni, normalment ma jagħmlux differenza lill-biljuni ta’ nies, bil-kuntrarju li ġara f’dan il-każ.
Qabel ma għaddiet din il-liġi kienu bosta manifatturi li diġà kienu bdew jimmanifatturaw l-apparat tagħhom b’din il-port. Madanakollu, l-kumpanija ġganteska Apple kienet għadha tuża charger differenti.
Għalhekk din il-liġi essenzjalment pprojbiet lil din il-kumpanija milli tbigħ l-iPhone fil-pajjiżi tal-Unjoni Ewropea, jekk dawn ma jkunux tat-tip USB-C.
L-argument li kien ressaq Agius Saliba u li ġie nnutat ukoll mill-Wall Street Journal kien dak ta’ charger komuni huwa sens komun, bir-riżultat se jkun li miljuni kbar ta’ nies se jkollhom ħajjithom aktar faċli.
“This is the past, this is the present.”
Minkejja li għaddew mal-għaxar xhur minn dan id-diskors, biljuni ta’ persuni li jagħmlu użu mill-ismartphone tal-Apple jew prodotti oħra se jkunu qegħdin jesperjenzaw din id-differenza b’mod tanġibbli fil-ġimgħat li ġejjin.
Dan hekk kif, il-ġimgħa d-dieħla mistenni jkun żvelat il-mudell il-ġdid tal-iPhone, b’dan mistenni jkun mgħammar bil-USB-C.
Uffiċjal sostna li l-kumpanija ma kellha l-ebda għażla ħlief li tkun konformi ma’ din il-liġi.
Ma’ dan l-istazzjon, Alex Aguis Saliba stqarr li din il-bidla issa se tkun qed isseħħ wara snin ta’ reżistenza mill-manifatturi.
“Mis-sena li ġejja ‘l quddiem kull konsumatur, u għalhekk sens komun se jkun jista’ juża charger wieħed biex jiċċarġja l-ismartphone tiegħu, it-tablet tiegħu, il-laptop tiegħu, id-digital camera tiegħu. B’wire wieħed tista’ tiċċarġja dawn l-affarijiet kollha. Aktar konfrot għan-nies, inqas spejjeż f’materjal li ma kellniex bżonnu u fl-aħħar mill-aħħar ukoll il-ġid li se nħallu fl-ambjent.”
Fil-fatt, qiegħed ikun stmat li b’din il-liġi se jiġu ffrankati mal-mitejn u ħamsin miljun dollaru Amerikan li jintefaq f’chargers differenti u mal-ħdax-il elf tunnellata ta’ skart elettroniku fis-sena.
F’kitba fuq Twitter, il-Prim Ministru Robert Abela kellu wkoll kliem ta’ tifħir fil-konfront ta’ Agius Saliba, li sarraf kisba importanti li se tkun qed tħalli effetti pożittivi fil-ħajja taċ-ċittadini tal-Unjoni Ewropea.
