Isem Tiziana Carannante sar familjari ma’ dilettanti sportivi. F’Novembru rrapportajna li rebħet midalja tad-deheb storika waqt il-Kampjonati tat-Ten Pin Bowling tal-Commonwealth.
Ftit tal-ġimgħat ilu kienet waħda mir-rebbieħa prinċipali fi Sport Malta Awards. Hija rebħet l-unur Sportiva tas-Sena. L-isport li tispeċjalizza fih mhux komuni daqs kemm, ngħidu aħna, hu l-futbol. Ġietna kurżità għalhekk nitkellmu ma’ Tiziana.
Kif bdiet l-imħabba tiegħek lejn il-bowling?
Bdejt bowling meta kelli biss seba’ snin. Issa ili 22 sena nagħmel dan l-isport. Kien jeħodna missieri kull nhar ta’ Sibt, u kien hemm waħda li kienet tittrenja u taf lil ommi, u qaltilha biex nibda training. Minn hemm bdejt SkolaSport u coaching privat, sakemm wasalt s’hawn!
Taħseb li f’Malta hawn interess fil-bowling bħala sport professjonali u mhux biss passatemp?
Hawn Malta għall-pajjiż żgħir li aħna, naħseb hawn nies mhux ħażin jiħduh bis-serjetà, jiddedikaw ħin għat-training matul il-ġimgħa u jilagħbu f’leagues u tournaments. Ovvjament iktar ma jkun hawn, iktar aħjar biex l-isport jibqa’ jikber. Hawn ukoll grupp ta’ nies oħra li jiġu biex jaqtgħu naqra mill-ħajja ta’ kuljum u jiltaqgħu mal-ħbieb, imma naħseb li dik issibha f’kull sport.
X’irid ikollok biex tkun tajjeb fil-bowling professjonali?
Fil-bowling irid ikollok żgur attitudni pożittiva, mental game tajba biex tibqa’ ffukata fil-logħba tiegħek, ma toqgħodx tħares lejn scores ta’ ħaddiehor u konsistenza biex tirrepeti ix-shots.
X’tip ta’ xogħol jirrikjedi li tkun professjonali fil-bowling?
Jiena nittrenja diversi sigħat tul il-ġimgħa. Mal-coaches bħala squad kull nhar ta’ Erbgħa u Ġimgħa, sagħtejn kull darba. It-Tnejn nipprova ninżel nagħmel session għalija u ġieli jkolli one on one mal-coach. Kull nhar ta’ Ħamis ikollna id-Division 1 League li jintlagħab 4 men team. F’nofs is sena jibda wkoll id-doubles league li jintlagħab kull nhar ta’ Tlieta. Għall-bowling trid training apparti fil-logħba fuq il-lanes biex titgħallem it-teknika u kif jintlagħbu ċertu patterns, trid ukoll eżerċizzji fiżiċi (per eżempju jiena mmur pilates) u mentali.
X’kienet ir-reazzjoni tiegħek wara l-premju Sportiva tas-Sena?
Ġieli kont innominata f’dawn l-awards imma dejjem bħala doubles jew team. Qatt ma bsart li xi darba kin se jirnexxili nirbaħ sportswoman of the year imma dejjem kienet ix-xewqa tiegħi u ħdimt ħafna bix ksibt dan is-suċċess tant kbir. Kont emozzjonata ħafna minn meta bdew il-voti, sakemm tlajt fuq il-palk għall-award u kelli nagħmel diskors fejn bilkemm flaħt nitkellem. Meta taħseb fix-xogħol kollu wara dan is-suċċess ma tistax ma tkunx ferħana għal dan ir-rikonoxximent, speċjalment wara li tkun għaddejt minn żmien mhux daqshekk tajjeb fl-isport li tant inħobb.
Għandek xi parir għal min qed jitħajjar jieħu l-bowling bis-serjetà?
Il parir li nagħti huwa li m’għandek qatt taqta’ qalbek u jekk tħobb dak li tagħmel, tibqa’ tiġġieled għal dak li tixtieq biex tikseb l-aħjar riżultati. L-aħħar parir huwa li tibqa’ dejjem saqajk mal-art.
