Il-Valletta Local Food Festival hu ċelebrazzjoni ta’ ikel u xorb lokali li se jiġi organizzat bejn il-5 u s-7 ta’ Ottubru li ġej fil-Valletta Design Cluster. Dan il-festival jiġbor flimkien kokijiet lokali u artiġġjani fejn se joffru lill-pubbliku festa kulinari Maltija.
Il-kok rinomat Renato Briffa se jkun ukoll preżenti waqt l-avveniment b’dimostrazzjonijiet ta’ tisjir u għarfien siewi dwar it-tħejjija ta’ ħelu tradizzjonali, bħall-kwareżimal, il-Vallettani, il-biskuttini tar-raħal u pasti oħrajn, kollha maħdumin b’ingredjenti friski ta’ oriġini lokali.
Il-festival se jkollu wkoll firxa ta’ birra artiġjanali Maltija.
Dan l-avveniment, imtella’ mill-Aġenzija Kulturali għall-Belt Valletta (VCA), hu wkoll appoġġjat minn VisitMalta.
Iċ-Chairperson tal-Aġenzija Kulturali għall-Belt Valletta, Jason Micallef, qal li dan il-festival mhuwiex biss avveniment kulinarju, iżda hu ċelebrazzjoni tal-identità ta’ gżiritna u r-rabta profonda bejn l-ikel, il-kultura u l-komunità.
Qal, “Għaqqadna dak kollu li hu awtentiku Malti, it-tradizzjonijiet tagħna permezz tal-gastronomija. Ukoll hi ċelebrazzjoni tas-suċċess tal-produtturi Maltin. Hawnhekk għandna ikel li jibda Malta u jibqa’ Malta.”
Min-naħa tiegħu, iċ-Chairman tal-MTA, Gavin Gulia, qal li dan l-avveniment jattira t-turisti, għax joffri esperjenza unika tal-ikel tipiku Malti.
Il-Ministru għall-Wirt Nazzjonali, l-Arti u l-Gvern Lokali, Owen Bonnici, qal li din iċ-ċelebrazzjoni annwali tal-wirt kulinari għani Malti toffri esperjenza gastronomika u kulturali indimentikabbli lil dawk kollha li jattendu.
“Aħna nemmnu li, b’dan il-festival, qegħdin insaħħu l-prodott turistiku ta’ pajjiżna. Imma aktar minn hekk qegħdin nippriservaw u ntejbu l-identità Maltija li tant nħobbu.”
Tkellem ukoll id-Direttur Artistiku tal-Valletta Local Food Festival, Charles Bone, li stieden lil kulħadd biex jingħaqad flimkien għal din l-esperjenza sabiħa ta’ togħmiet u aromi differenti minn Malta.
