Fil-qalba u fil-ħemda tal-belt tas-Siġġiewi, ħames anzjani nisa mimlijin ħajja, se jirrakkontaw stejjer tal-passat fi produzzjoni teatrali.
“F’Ħakka t’Għajn”, hija produzzjoni teatrali li qed issir b’kollaborazzjoni bejn l-Università ta’ Malta u d-Dipartiment tal-Anzjanità Attiva, bħala parti minn riċerka ikbar li tinvolvi bosta pajjiżi.
Dr Isabelle Gatt, il-produttur tad-dramm, spjegat li l-anzjani għandhom ħafna x’joffru lis-soċjetà, u biex iħejju ruħhom bl-aħjar mod, qed jagħmlu eżerċizzji tat-teatru u tal-ħsieb spiritwali.
Qalet, “Ġbarna l-istejjer minnhom għall-iskritt u din hija importanti ħafna għaliex dan jiġifieri huwa skritt tagħhom li nħoloq minnhom u ovvjament imbagħad kellna kittieb, Simon Bartolo li żewwaqhom vera sbieħ flimkien u rnexxielu jagħmel xi ħaġa sħiħa.”
Gloria Callus, waħda mill-anzjani li qed tieħu sehem f’din il-produzzjoni, stqarret li dan id-dramm taha l-opportunità li tiltaqa’ man-nies u tintegra, minkejja ż-żmien diffiċli li għaddejjin minnu.
Qalet, “Għamilt Facebook chat u apparti li niġu filgħodu nagħmlu xi tliet sigħat, erba’ sigħat, nerġgħu nagħmlu xi tliet sigħat oħra filgħaxija fuq ic-chat imma biex iżjed nitgħallmuha u aħna we want to prove ourseleves excellent.”
L-opportunità li jirritornaw fil-passat fissret ħafna għal dawn l-anzjani, u lil Gloria staqsejniha jekk tmurx lura kieku tista’.
Spjegat, “Le qatt ma rrid nerġa’ mmur lura lejn il-passat jiena, ilbieraħ kien ilbieraħ, għada ma jimpurtanix, illum qiegħda ngħix, il-motto tiegħi dik hi.”
Fost l-istejjer li ssemmew, spikkat dik tal-għanja tal-banju.
Doris Borg qaltilna li fl-antik, in-nisa kienu jkantawha waqt li jaħslu l-ħwejjeġ, u ma naqsitx milli tkantalna biċċa mill-għanja li minjaf kemm ġabitilha memorji.
Qalet, “Ħanina kemm inti sabiħa u isbaħ minnek ma narax nixtieq li nbusek bewsa imma għalissa ma nistax.”
