Sharon Mizzi qed issegwi l-ħolma tagħha u qed tistudja fil-University of Southern California fl-Istati Uniti. Iżda mhux biss, dan hekk kif Sharon ta’ tnejn u għoxrin sena minn Għawdex qiegħda tmidd l-ewwel passi tagħha fid-dinja tal-Youtubing, industrija ta’ YouTube li qed tikber b’passi ta’ ġgant u toffri opportunitajiet kbar lill-utenti tagħha biex isiru magħrufin mad-dinja kollha.
Sharon spjegat ma’ ONE News kif bdiet toħloq il-filmati tagħha wara inkorraġġament minn sħabha tal-kors, li wkoll joħolqu l-filmati u għandhom mijiet ta’ eluf ta’ segwaċi.
Sharon qalet li “X’ħin mort hemmhekk bdejt niltaqa’ ma’ dawn l-artisti kollha. Hemm min għandu diġa 1 million followers u qiegħed fil-klassi miegħi u bdew jagħmluli motivazzjoni biex nibda u fl-aħħar bdejt.”
Il-filmati li toħloq Sharon jiffukaw l-iżjed fuq is-sbuħija u l-moda.
Spjegat kif “Il-videos tiegħi huma lifestyle based u nagħmel beauty, fashion. Dejjem nipprova nagħmel xi ħaġa ġdida. M’iniex focused on one għax I’m not a professional.”
Minkejja li għadha tibda fl-industrija, professjonisti fil-qasam huma mpressjonati bil-progress tal-udjenzi għall-filmati tagħha.
Qalet li “In-nies li bdew fuq youtube qaluli li qed nikber b’rata malajr, jiġifieri hopefully naraw nibqgħux tilgħin.”
Xi ħaġa li ġibdet l-attenzjoni tal-ġgant Amerikan tal-midja soċjali, dan hekk kif Sharon kienet mistiedna għal konferenza organizzata u setgħet titgħallem iżjed dwar din l-industrija.
Sharon qalet li “Meta tfajt l-ewwel żewġ jew tliet videos irċivejt email minn youtube. Kien hemm xi showing tal-creators for change u invitawni biex immur il-youtube space LA biex mmur għal screening tagħhom.”
Hawnhekk Sharon kellha ċ-ċans li tiltaqa’ ma’ wħud mill-ikbar influwenzaturi fl-industrija tal-YouTubing u x-xena tal-ispettaklu.
Spjegat kif “Iltqajt ma’ Mario Dedivanovic li hu l-make-up artist ta’ Kim Kardashian West u ltqajt ukoll meta mort il-creators for change event ma’ vlogger FunforLouis li għandu iktar minn 2 million subscribers u kienet vera esperjenza sabiħa għax billi konna magħżulin u konna ftit għall-event, stajt inkellmu b’mod personali.”
Il-ħolma ta’ Sharon hi li tkompli timraħ f’dan is-suġġett.
Qalet li “Jiena nixtieq li nkompli ovvjament fl-industrija tal-entertainment jew marketing u jekk ikolli opportunita hemmhekk, issa naraw imma dejjem nimxi ‘l quddiem u nara xi jkun hemm għalija.”
