Tkompli l-avventura tat-tennista malti Alex De Gabriele, fl-Istati Uniti. De Gabriele ilu mill-2022 jistudja u jitħarreġ f’North Carolina bħala parti mill-Malta Sports Scholarships Scheme mill-Ministeru tal-Edukazzjoni. Hemmhekk, għal dawn l-aħħar sentejn, kien qed jistudja fl-Universita’ ta’ North Carolina f’kors ta’ Business Administration.
Apparti l-istudju, De Gabriele jilgħab u jitħarreġ fil-logħba tat-tennis mat-team tal-istess Universita’. Fil-fatt f’dawn l-aħħar ġranet, it-tennista malti kompla bit-taħriġ tiegħu mat-team tal-Universita’ ta’ Nort Carolina wara li kien wieqaf għal xi żmien minħabba li kien imweġġa’.
Bħalissa l-Universita’ ta’ North Carolina qed tħejji sabiex tilgħab fit-turnament ta’ tmiem l-istaġun magħruf bħala l-Colonial Athletic Association Conference. Huma qed jimmiraw li jirbħu dan it-turnament għar-raba’ darba konsekuttiva. Rebħa tiftħilhom iċ-ċans li jikkompetu fl-NCAA National Championship, li huwa l-iktar tournament prestiġjuż għall-kulleġġi amerikani.
Intant f’Mejju li ġej Alex se jkun qed jirritorna fl-Ewropa sabiex ikompli bl-impenji mat-team Mediterraneo CT fil-kampjonat taljan tasd-Serie B.
Issegwi l-parteċipazzjoni tiegħu fit-Tazza Davis bħala parti mit-team malti tal-Federazzjoni tat-Tennis. Huwa se jkun qed jieħu sehem ukoll fil-Pro ITF Circuit, b’logħbiet skedati kontra t-Tuneżija u l-Belġju. Alex imbgħad jirritorna l-Istati Uniti f’Awwissu.
Alex De Gabriele huwa meqjus bħala wieħed mill-aktar plejers promettenti tat-tennis malti. Għadu kemm temm b’suċċess programm ta’ taħriġ fi Sqallija, programm kien possibli grazzi għall-Malta Sports Scholarships Scheme fi ħdan il-Ministeru tal-Edukazzjoni.
