Malta bdiet il-Kwalifiki tal-Kampjonat Ewropew tan-Nisa tal-UEFA ta’ taħt id-19-il sena nhar it-Tlieta b’telfa kbira ta’ 6-0 kontra l-Kosovo fis-Centenary Stadium, bil-Kosovari jirriżultaw bħala wisq b’saħħithom għat-tim żagħżugħ Malti.
Il-Kosovo bdew bħala l-aktar b’saħħithom miż-żewġ timijiet, u damu biss sitt minuti biex kellhom l-ewwel opportunità tagħhom ta’ skor. Sahare Berisha ittantat xortiha b’xutt mid-distanza, iżda dan ġie salvat mal-lasta mill-goalkeeper Maltija Erika Muscat, li mbagħad ġabret il-ballun.
Malta wieġbet fis-17-il minuta u kellha ċans brillanti li tmur fil-vantaġġ, meta wara kontrattakk veloċi mil-lemin, il-ballun intemm għand Ema Micallef, li sparat xutt b’saħħtu li stampa mal-mimduda.
Madankollu, il-Kosovo fetħu l-iskor fil-21 minuta, wara li corner ma ġiex ikklerjat mid-difiża Maltija, b’Elona Paci tefgħet il-ballun fix-xibka mill-viċin. Il-Kosovo heddew li jirduppjaw l-iskor fis-26 minuta, wara li Riga Kallaba reġgħet ġiet wiċċ imb’wiċċ ma’ Muscat, iżda l-goalkeeper Maltija flimkien mad-difiża Maltija, ċaħdet lill-Kosovo milli jiskorjaw it-tieni goal.
Muscat reġa’ ġiet imsejħa fl-azzjoni fit-30 minuta, b’save eċċellenti hekk kif il-Kosovo komplew iżidu l-pressjoni.
Il-Kosovo eventwalment kisbu t-tieni goal fid-39 minuta, hekk kif wara li rċeviet minn freekick, Ollsa Maqastena, mill-viċin tefgħet il-ballun fix-xibka.
Malta wieġbet mill-ewwel, hekk kif corner ġie mdawwar fil-kaxxa tal-penalty, bil-ballun jintemm għand Stella Francalanza, li kellha d-daqqa ta’ ras tagħha tintemm ftit barra.
Madankollu, il-Kosovo marru għall-mistrieħ tliet gowls minn fuq, hekk kif kontrattakk veloċi wassal biex Paci tegħleb għal kollox lil Muscat.
Wara l-mistrieħ, Malta ħarġet aktar kunfidenti fil-logħob tagħa, u rebħet aktar mid-duelli. Minkejja dan, il-Kosovo skorjaw ir-raba’ goal fil-partita meta wara taħwida fil-kaxxa, Riga Kallaba tefagħet il-ballun fix-xibka.
Il-Kosovo għamluhom ħamsa fis-70 minuta permezz ta’ Paci, biex b’hekk irreġistrat hat-trick personali. Il-Kosovo ssiġillaw ir-rebħa permezzz tas-sitt goal eżatt qabel tmiem id-90 minuta, permezz ta’ Besjana Zogaj.
Malta terġa’ tkun impenjata kontra l-Latvja nhar il-Ġimgħa 4 ta’ April, bil-kick-off fis-2.30pm.
