It-Teatru Pandora fiż-Żejtun se jkun qed jospita l-ewwel uffiċċju ta’ Teatru Malta, il-Kumpanija Nazzjonali tat-Teatru li għadha kif twaqqfet. It-Teatru Pandora huwa mmexxi mill-Għaqda Banda Żejtun u nbena bejn l-1950 u l-1955 minn Edwin England Sant Fournier. It-teatru ospita varjetà ta’ avvenimenti tal-komunità matul is-snin u huwa meqjus bħala wieħed mill-ikbar spazji teatrali fuq il-gżira. Dan l-aħħar it-Teatru Pandora għamel xi xogħlijiet fuq il-foyer u fuq l-ispazju għall-uffiċċju li issa se jilqa’ uffiċjalment fi ħdanu l-ewwel uffiċċju ta’ Teatru Malta. Teatru Malta se jagħmel ukoll użu mill-ispazju tat-teatru bħala post fejn isiru l-provi fi proġetti futuri.
“Dan huwa eżempju konkret ħafna tal-identità komunitarja qawwija li għandu Teatru Malta. Aħna qed nissellfu spazju mill-komunità biex proġett bħalma huwa Teatru Malta jkun jista’ jaħdem minn ħdanu. B’dan il-mod, aħna qed ninvestu fil-komunitajiet kemm mil-lat ta’ infrastruttura kif ukoll minn dak artistiku,” qal is-Sur Albert Marshall, chairman tal-Kunsill Malti għall-Arti.
“Fil-qalba tal-komunitajiet tagħna, aħna nħossuna eqreb ta’ dak li aħna. Aktar ma nikbru, aktar ma nistgħu nimmiraw ’il fuq; qed noħolmu li jkollna aktar uffiċċji reġjonali fil-ħames snin li ġejjin,” qal id-Direttur Artistiku Sean Buhagiar, li ta wkoll togħma żgħira tal-programm li hemm maħsub għal dawn l-ispazji. “Filwaqt li l-programm tagħna se jinkludi stili u tipi differenti ta’ teatru, aħna se nkomplu niffukaw fuq l-importanza tal-iżvilupp tal-udjenzi. Bħala wieħed mill-proġetti komunitarji li se jittellgħu fit-teatri komunitarji mxerrdin mal-gżira kollha, aħna kkummissjonajna Il-Madonna Tiegħi Aħjar Minn Tiegħek – operetta b’kompożizzjoni ta’ Alex Vella Gregory u librett ta’ Trevor Żahra li se tkun qed ddur bosta minn dawn it-teatri. L-operetta se tkun qed tiffoka fuq il-kultura tal-festi u s-simboliżmu reliġjuż f’Malta. Filwaqt li tirrispetta l-valuri lokali, dan huwa proġett immirat l-aktar għad-dilettanti tal-festi u ta’ dan is-suġġett. Aħna nittamaw li mbagħad dawn l-udjenzi jieħdu interess f’uħud mix-xogħlijiet l-oħra tagħna li mhux bilfors ikunu interessawhom mill-bidu,” temm jgħid Buhagiar.
Il-Ministru Owen Bonniċi qal li dawn il-proġetti se jsiru taħt il-patroċinju tal-Ministeru peress li jirfdu l-politika u l-istrateġija kulturali tal-Ministeru. “Aħna kburin ħafna li l-kumpanija nazzjonali tat-teatru qed tniedi l-ewwel uffiċċji tagħha ġewwa wieħed mill-isbaħ teatri tal-komunita’. Il-fatt li qed jilqgħuna f’dawn l-uffiċċji u li qed naħdmu fuq dawn il-proġetti jagħti xhieda tal-intenzjoni tagħna li naħdmu lejn id-demokratizzazzjoni kontinwa tal-arti u l-kultura,” qal il-Ministru responsabbli għall-Kultura.
L-ewwel uffiċju ta’ Teatru Malta se jkun ġewwa t-Teatru Pandora, Triq il-Ħerba, iż-Żejtun. Kull min hu interessat jirċievi emails bl-aħbarijiet mingħand Teatru Malta huwa mistieden iżur www.teatrumalta.org.mt. Teatru Malta għandu jniedi l-ewwel programm tiegħu għall-2018 f’Diċembru 2017. Teatru Malta huwa proġett appoġġjat mill-Kunsill Malti għall-Arti.
