- AVVANZAT IR-RESTAWR FIS-SULAR TA’ TAĦT IL-BIBLJOTEKA NAZZJONALI
- IL-ĠMIEL TAL-POST JIDHER MILL-ĠDID
Is-sular ta’ isfel tal-bini li jilqa’ fih il-Bibljoteka Nazzjonali, fejn għal snin twal kien hemm il-Cafe Premier, qed jingħata lura l-glorja li tixraqlu bħala parti minn proġett ta’ restawr li għandu l-għan aħħari li l-post jintuża mill-komunità. Fil-fatt il-binja li mingħand il-privat għaddiet għand il-gvern issa se tintuża mill-Kunsill Lokali tal-Belt Valletta li kien ilu snin twal jokrob biex ikollu post ċentrali minn fejn jaħdem. Waqt li kien qed jissorvelja x-xogħol ta’ restawr ltqajna fuq il-post mal-Perti mid-Direttorat tar-Restawr Manuel Ellul li fehemna b’sodisfazzjoni kif dawk li kienu kċina u ristorant issa reġgħu nbidlu għalkollox. B’ħaddiema tad-Direttorat tar-Restawr jużaw il-ħila tagħhom biex jikxfu r-rikezzi li qajla konna nafu bihom.
“Bażikament fl-aħħar xhur sar ħafna xogħol ta’ strutturi li kien hawn mibnija f’dan il-post li issa riduh iservi l-funzjoni ġdida ta’ Kunsill Lokali. Neħħejna l-affarijiet li kien hawn kollha biex inkunu nistgħu nagħmlu evalwazzjoni tal-istruttura oriġinali bħal ħnejjiet u volti ta’ dan il-bini biex ikun jista’ jiġi restawrat,” qal il-Perit Ellul li enfasizza kif ħafna mis-sabiħ tal-bini kien mgħotti kollu.
“Kienu saru interventi li għamlu ħsara li aħna erġajna bnejna u rranġajna biex wieħed jara l-post lura kif kien,” kompla l-Perit.
Fakkar li dan huwa bini li nbena fl-aħħar żmien tal-Kavallieri u nbena bħala librerija li dejjem kienet maħsuba li tkun mikrija lil terzi biex il-Kavallieri jkunu jistgħu jagħmlu t-tmexxija tagħhom.
“Għandek ħafna kmamar b’volti kbar, waħda minnhom dekorata, u l-binja tirrifletti dak li hemm fuq il-Bibljoteka Nazzjonali,” spjega l-Perit li fisser kif minbarra l-uffiċċju tal-Kunsill Lokali l-proġett għandu għanijiet oħra.
“Il-brief li ngħatajna bħala periti tad-direttorat tar-restawr li ladarba l-post ġie lura għand il-Gvern isir proġett li jagħmel il-librerija iktar aċċessibbli. Biex tidħol fil-Librerija Nazzjonali għandek żewġ sulari taraġ u għal tul ta’ żmien kien qed isir sforz biex isir lift. Dan ma kienx possibbli għax il-post ma kienx tal-Gvern u b’din l-opportunità se noħolqu aċċess ġdid u l-Bibljoteka Nazzjonali tkun aċċessibbli,” qal Ellul li nnota kif se ssir ukoll librerija pubblika għar-residenti tal-Belt u dawk li jżuru l-Belt u faċilitajiet sanitarji li bħalissa l-bibjloteka m’għandiex adegwati.
Għal Perit Ellul huwa dejjem ta’ sodisfazzon li jkollu ċ-ċans jaħdem fuq proġetti ta’ dan it-tip.
“Huwa ta’ gratitudni kbira u impenn ikbar meta tirrestawra binja bħal din u filwaqt li ġġibha għall-istat oriġinali u tagħtiha funzjoni għan-nies, aħna nagħmlu dan kollu b’imħabba. Għax l-ewwel xogħol hu li tistudja u tfittex pjanti antiki. Għall-Kunsill tal-Belt huwa post ċentrali, aċċessibbli għal kulħadd li mhux se jintuża bħala uffiċċju tal-Kunsill imma s-swali jistgħu jagħtu lok biex jinqdew in-nies tal-belt,” qal Ellul li fisser l-eċċitament tiegħu ta’ kif f’każ bħal dan qatt ma taf x’se ssib.
“Għalkemm tara ħafna pjanti u dokumenti waqt ix-xogħol tiskopri affarijiet li ma jkunux dokumentati. Dejjem tiskopri affarijiet ġodda. Għamilna laser scan u issa għandna mudell 3D tal-istrutturi t’hawn u l-librerija ta’ fuqhom,” temm Ellul filwaqt li ħallejnieh ikompli fuq xogħlu mal-ħaddiema bl-istedina issa tkun għal ħabta ta’ Mejju meta l-ewwel fażi tax-xogħol għandha tkun lesta u wieħed jifhem u japprezza iktar il-bżonn li jinbidel id-destin ta’ dan il-post.
