Santa Lucia kisbu l-ewwel rebħa ta’ l-istaġun meta rnexxielhom jegħlbu lil Mosta b’goal uniku li wasal f’nofs l-ewwel taqsima, hekk kif Mosta reġgħu ddiżappuntaw u qatt ma dehru f’pożizzjoni li jirkupraw l-iżvantaġġ minimu li kellhom.
L-ewwel taqsima kienet pjuttost bilanċjata bit-team ta’ Santa Lucia xi ftit aktar perikoluzi fil-konklużjonijiet taghhom, tant li l-ewwel azzjoni denja wasslet għall-goal deċiżiv li wasal fil-21 minuta permezz ta’ Adam Bradshaw li għeleb lill-goalkeeper Mosti Udoh Akpan b’xutt li spiċċa fir-rokna tax-xibka.
Mosta ppruvaw iwettqu reazzjoni iżda Gianluca Sciberras fit-28 minuta xxuttja għoli minn tarf il-kaxxa, waqt li tliet minuti wara tentattiv ta’ Aliyu Isah niżel fuq is-saqaf tax-xibka.
Fl-34 minuta Santa Lucia wieġbu b’azzjoni personali ta’ Alessio Piazza li x-xutt angolat tiegħu għadda ftit għoli.
Is-Saints baqgħu jippersistu u fl-44 minuta kien Mattias Ellul li x-xutt tiegħu għadda ftit barra, waqt li fil-ħin miżjud il-goaler Akpan salva b’diffikulta’ tentattiv iehor ta’ Piazza.
Fit-tieni taqsima Mosta ppruvaw iwettqu xi forma ta’ reazzjoni imma qatt ma kienu effettivi.
Anzi kienu Santa Lucia li ħolqu l-aħjar okkażjonijiet. Fid-59 minuta minn freekick ta’ Isah, Chara Valois ixxuttja ftit barra, waqt li fit-72 minuta reġa’ kien Isah li ttanta xortih b’xutt mill-bogħod li għadda ftit barra.
Fit-80 minuta Mosta ħadu daqqa ta’ ħarta meta d-difensur Sasha Cachia ntwera żewg karti sofor wara xulxin, l-ewwel għal foul fuq plejer avversarju u mmedjament wara għal xi rimarki li wisq probabbli għadda lir-referee, biex il-Mostin kellhom jilghabu l-aħħar ħinijiet bi plejer anqas.
Fit-tielet minuta tal-ħin miżjud Santa Lucia reġgħu resqu qrib b’xutt angolat ta’ Piazza li għadda tul il-lasta, waqt li ftit wara Mosta kellhom freekick minn pozizzjoni ċentrali barra l-kaxxa l-kbira, imma x-xutt ta’ Kevin Tulimieri ġie salvat bla wisq diffikulta’ mill-goaler Da Paz.
Referee: Ishmael Barbara
BOV Plejer tal-logħba: Adam Bradshaw (Sta Lucia)
