Tas-Civil Society Network, li jorganizzaw il-protesti u magħhom ikun hemm tar-Repubblika, Manuel Delia u tal-fazzjoni ta’ Simon Busuttil qed jheddu lill-Kap Nazzjonalista Bernard Grech li se jiftħu partit ieħor li jieħu post il-Partit Nazzjonalista.
Tas-Soċjetà Ċivili għamlu din it-theddida forma ta’ mistoqsija fuq il-paġna tagħhom fuq Facebook għaliex saħqu li l-Oppożizzjoni hi dgħajfa.
Din id-dikjarazzjoni tas-Civil Society Network saret fl-isfond tal-aħħar attakk fuq Adrian Delia.
Imkejjen fid-Dar Ċentrali nnutaw li l-Kap Nazzjonalista Bernard Grech qed jaffaċċja pressjoni ġdida biex ineħħi lil Adrian Delia u jġagħlu jirriżenja wara r-rapport tal-Lovinmalta, li allega li Delia kien f’kuntatt mas-suspettat mandant fil-qtil ta’ Daphne Caruana Galizia, Yorgen Fenech, waqt dibattitu parlamentari wara li sar magħruf li Fenech huwa s-sid tal-kumpanija 17 Black.
Delia ċaħad din l-allegazzjoni u qal li din hija gidba, tant li fetaħ libell kontra s-sit imsemmi.
Din mhux l-ewwel pressjoni li affaċċja Bernard Grech biex iqaċċat lil Delia, minn mindu sar Kap f’Ottubru li għadda.
Bernard Grech kellu pressjoni biex Delia ma jitħalliex jikkontesta l-elezzjoni ġenerali li jmiss.
Fuq quddiem jagħmel din il-pressjoni hemm Beppe Fenech Adami u n-nies tiegħu, li jaraw lil Delia bħala theddida għall-voti fuq it-tmien distrett, id-distrett li fih jinkludi Birkirkara, fortizza ta’ Fenech Adami.
Wara l-każ tad-donazzjoni ta’ nofs miljun ewro li ppreżenta Delia f’isem Catco Group lid-Dar tal-Providenza, liema donazzjoni ma ntlaqgħetx wara skrutinju li sar fuq il-grupp, Bernard Grech ġie iżjed imbarazzat u kellu pressjoni x’għandu jagħmel b’Adrian Delia.
F’Mejju wkoll, Manuel Delia, l-eks chief of staff ta’ Austin Gatt, beda jiddetta lil Bernard Grech biex ma jħalliex lil Delia joħroġ għall-elezzjoni li ġejja.
Dan wara battibekki fil-beraħ bejn Delia u Jason Azzopardi, b’Delia jgħid li Jason Azzopardi giddieb.
Din il-kwistjoni raqdet ftit wara li Jason Azzopardi kien kostrett jirtira l-allegazzjonijiet li kien għamel fuq Adrian Delia, allegazzjonijiet li fuqhom Delia ġie sfiduċjat minn Kap.
Fost l-allegazzjonijiet kien hemm li Delia kellu mijiet ta’ messaġġi ma’ Yorgen Fenech.
Issa, bl-aħħar dikjarazzjoni tas-Civil Society Network, il-pressjoni minn ta’ Busuttil fuq Bernard Grech qed tkompli tikber.
Fi kliem ieħor il-messaġġ huwa; jew tqaċċat lil Delia jew inkella ħa niżolaw lilek miegħu u niftħu partit ieħor!
