Fil-ġimgħat li ġejjin madwar mitt sid ta’ karozza elettrika se jkunu jistgħu jieħdu sehem fi proġett pilota u jibbenefikaw minn rata speċjali ta’ ftit anqas minn tlettax-il ċenteżmu għal kull unit biex jiċċarġaw il-karozza tagħhom mill-kumdità ta’ djarhom.
F’konferenza tal-aħbarijiet, il-Kap Eżekuttiv tal-Enemalta l-Inġinier Jason Vella ħabbar li t-tariffa fissa se tapplika bejn nofsilejl u s-sitta ta’ filgħodu. Spjega li l-ispejjeż relatati mal-installazzjoni u l-użu tal-apparat se jingħataw b’xejn.
“Min għandu vettura elettrika jista’ japplika għal proġett pilota fejn inkunu qegħdin ninstallaw is-sistema li se tippermetti li l-klijent jkun jista’ jibbenefika minn flat rate biex jiċċarġja l-karozza tiegħu fis-sighat ta’ bejn nofsilejl u s-sitta ta’ filgħodu.” Stqarr Vella.
L-inġinier spjega li l-konsum se jitkejjel b’arloġġ tad-dawl apposta li se jibda jaħdem b’mod awtomatiku f’nofsilejl u jiġi diżattivat fis-sitta ta’ filgħodu. Spjega li matul il-jum, is-sidien xorta waħda se jkunu jistgħu jiċċarġaw il-karozza elettrika tagħhom minn darhom.
“Is-sistema nnifisha għandha functionality li qed insejħulha ta’ bypass fejn dak li jkun għal hin partikolari jabqbez il-hin bejn 12 u 6 biex ikun jista’ jiccarga b’mod normali f’dak il-kaz bit-tariffi normali tar-residenza tiegħu.” Kompla jgħid.
Fit-tnedija tat-tariffa l-ġdida, il-Ministru tal-Enerġija Michael Farrugia qal din l-inizjattiva se ddaħħal fis-seħħ miżura mħabbra fil-baġit għal din is-sena li tagħti tariffi orħos tad-dawl għal dawk li għandhom dawn il-karozzi li ma jħammġux l-ambjent.
Qal li bi tħejjija għall-qalba li pajjiżna jrid jagħmel għal karozzi elettriċi, il-Gvern irid jassigura li dan ma jżidx il-bżonn ta’ produzzjoni fuq il-ġenerazzjoni tal-elettriku f’pajjiżna. Spjega li għalhekk l-iskema se titħaddem matul il-lejl u fl-inqas ħinijiet li jintuża d-dawl.
Il-Ministru Farrugia stqarr, “Din hija a win-win situation fejn il-konsumatur iħallas inqas fejn il-pressure fuq il-gnerazzjoni ma togħlix izzejjed milli fil-fatt tkun il-produzzjoni tal-pajjiż.”
Huwa qal li dan il-proġett mistenni jiġi implimentat b’mod sħiħ fil-ġimgħat li ġejjin wara li l-inġiniera tal-Enemalta jassiguraw li s-sistema tkun qed taħdem skont kif ippjanat.
