Taljan arrestat b’rabta ma’ serq minn vetturi fl-Imġarr u l-Mosta

Taljan ta’ 25 sena li jgħix l-Imġarr ġie arrestat b’rabta ma’ serq minn vetturi fl-Imġarr u l-Mosta.

Fi stqarrija mill-Pulizija ntqal li l-Pulizija kienet ilha għaddejja jiem b’sorvelljanza b’rabta ma’ serq minn vetturi fiż-żewġ lokalitajiet.

Waqt ronda, fi Triq Sir Harry Luke, għall-ħabta tat-3:15 tal-Ħadd filgħodu, il-Pulizija nnutaw persuna li kienet taqbel mad-deskrizzjoni li ngħatat u li allegatament kienet qegħda ddur b’mod suspettuż ma’ xi vetturi.

Hawnhekk il-Pulizija arrestat lit-Taljan u minn tfittxija li saret fuqu u fil-vettura li kien qed juża, ġew elevati diversi oġġetti suspettati li jintużaw fis-serq, fosthom turnaviti.