Ta’ Xbiex Futsal u l-Universita’ ta’ Malta baqgħu jżommu r-rekord perfett tagħhom fl-Enemed Futsal League meta kisbu r-raba’ rebħa minn daqstant logħbiet.
Hekk kif iċ-champions Luxol ma kinux fl-azzjoni minħabba l-impenji tagħhom fil-UEFA Futsal Champions League, anke ŻRQ Bormla rebħu l-logħba tagħhom sabiex issa telgħu fit-tielet post tal-klassifika.
University of Malta ACJ iddominaw il-konfront tagħhom kontra s-selezzjoni Maltija ta’ taħt id-19-il sena hekk kif rebħu 9-1. L-iskorer prolifiku Cleavon Portelli skorja tripletta filwaqt li Aaron Montebello u Leo Muscat kienu awturi ta’ doppjetta kull wieħed. Steven Camilleri u Paul Scerri sabu wkoll ix-xibka għall-Universitarji. Iż-żgħażagħ Maltin naqqsu l-marġni tal-iskor minn Robert Malool Mustafa. Referees: Marco La Rosa u Sillah Alhasana.
Ta’ Xbiex għelbu lill-ġirien Sliema Futsal 6-1. Ir-rebbieħa kellhom l-ewwel taqsima perfetta fejn skorjaw ħames gowls mingħajr risposta sabiex setgħu jikkontrollaw sew it-tieni 20 minuta filwaqt li anke żiedu l-iskor. Liam Caruana kien awtur ta’ doppjetta personali sabiex Redeemer Borg, Bernardo Rosa, Matthias Camilleri u Ryan Debono komplew żiedu l-iskor. Is-Slimiżi naqqsu l-marġni tal-iskor minn Wallace Oliveira Santos. Referees: Andrea Naudi u Jude Amin Utulu.
ŻRQ Bormla kellhom rebħa komda ta’ 11-1 kontra Gżira United Santa Margherita. Kif jindika l-iskor, il-Bormliżi setgħu jamministraw l-40 minuta logħob b’Gabriel Ghigo, Jovica Milijic u Karl Sciortino awtur ta’ żewġ gowls kull wieħed. Rodrigues da Silva, Claudio Venuto, Karl Luke Schembri, Dylan Musu u Mohamed Elamari għaqqdu l-iskor għal ŻRQ Bormla. Il-Gżirjani skorjaw il-gowl ta’ konsolazzjoni permezz ta’ Yessous Camilleri. Referees: Clinton Cassar u Stefania Bonnici.
Fid-dwell bejn żewġ timijiet min-nofsinhar ta’ Malta, Birżebbuġa St Peter’s għelbu lil Marsaskala Futsal 6-4 f’logħba ferm sabiħa. Minkejja li kienu 3-2 minn taħt, it-tim minn Birżebbuġa baqgħu konċentrati u rnexxielhom idawru l-iskor favur tagħhom. Kieran Debono u Shataizan Zarb skorjaw doppjetta kull wieħed b’Julien Bollard u Alexei Saliba jniżżlu isimhom fost l-iskorers. L-Iskalin skorjaw permezz ta’ Alessio Restuccia, Amir Ashtiyani, Zemkin Seisun u awtogowl ta’ Owen Galea.
Referees: Jude Amin Utulu, Marco La Rosa.
