Fil-Moviment Żgħażagħ Partit Nazzjonalista reġgħu skattaw il-problemi. Dan minħabba li l-fazzjoni ta’ l-Eks-Kap tal-Partit Nazzjonalista Simon Busuttil hija determinata li ma titlfix il-kontroll tal-MŻPN u għalhekk qed tara li biex hekk kif jibda jaħseb biex jispiċċa l-President attwali, Joseph Grech, iddaħħal kandidat ieħor minn tagħha.
Il-gazzett Kullħadd irrapurtat kif Clyde Puli u l-fazzjoni ta’ Adrian Delia b’mod ċar għall-aħħar kienu qed jippreparaw liż-żagħżugħ Thomas De Martino li fl-aħħar xhur mexxa dak magħruf bħala Team Start. Fergħa taż-żgħażagħ li nħolqot biex tiġġieled lill-MŻPN. Dan għax Delia kien baqa’ ma sabx appoġġ miż-żgħażagħ tal-Partit li jmexxi hu stess. De Martino ħoloq tim madwaru li bih issa jrid jieħu kontroll tal-fergħa ewlenija tal-partit, iżda ta’ Busuttil qed jiġru wara Gabriel Micallef biex ikun hu l-kandidat għall-President tal-MŻPN.
Micallef, kunsillier il-Mellieħa hu meqjus bħala lealissimu għall-fazzjoni ta’ Busuttil. Il-fazzjoni ta’ Busuttil bħalissa qed taħdem bis-sħiħ sabiex ikollha swaba’ mdeffsin f’kull fazzjoni biex meta jiġi l-mument li jerġa’ jkun imminat il-Kap ikollhom appoġġ mill-iktar wiesa’. Is-Sajf li għadda wara t-telfa fl-elezzjoni tal-Parlament Ewropew il-fazzjonijiet fiż-żgħażagħ tal-Partit Nazzjonalista ħarġu qatta’ bla ħabel konta xulxin. Fejn mhux biss ħarġu żewġ rapporti fuq din l-istess telfa biex wieħed jgħid li tort ta’ Delia u l-fazzjoni l-oħra tisħaq li mhux il-każ. Saħansita l-ġlieda kompliet il-qofol tagħha bis-sħiħ fuq Facebook.
F’mument minnhom il-Viċi President tal-MŻPN, Nicky Azzopardi għajjar lill-President ta’ Team Start Thomas De Martino bħala handbag wara li ħareġ jattakka lil żagħżugħa li ppreżentat il-petizzjoni biex jittieħed vot fit-tmexxija ta’ Delia. Dakinhar De Martino, kien tefa’ botta u staqsa b’mod ċiniku jekk din hix li ttella’ fuq Instagram favur l-abort. Hawnhekk wieġbu Azzopardi u qallu li tinduna kemm il-problema hija traġika meta l-okkupanti ta’ wara l-fortizza tat-tieni sular, jibagħtu l-handbag tagħhom biex jattakkaw membri tal-partit b’mod personali. Żied jakkużah li lanqas huma denji jew kapaċi jmexxu l-fergħa li għandhom li sejħilha klabb tal-ħamiem ta’ ħames min-nies.
Mill-ewwel irreaġixxa Thomas De Martino li għajjar lil Azzopardi keychain. De Martino qal lil Azzopardi – “Il-keychain jgħajjar lil ħaddieħor handbag. Mela waqt il-kampanja elettorali li matulha l-partit tkellem bis-saħħa kontra l-abort, tiġi ħabibtek u titkellem favurih. Ara kif ġibtuha diżastru fergħa,” qal il-President ta’ Team Start, b’referenza għall-MŻPN. Dakinhar Nicky Azzopardi wieġeb lil De Martino u għajru kaboċċa, biex il-fergħat taż-żgħażagħ fi ħdan il-Partit Nazzjonalista komplew juru li huma xempju tal-qasma fonda li għadha hemm fil-Partit imexxi minn Adrian Delia.
