Hija l-kumpanija EMD Advisory Services, li tagħha Richard Cachia Caruana huwa konsulent ewlieni, li għandha l-ikbar numru ta’ rabtiet fost l-intermedjarji ma’ kumpaniji li jissemmew fil-Panama Papers. Tant hemm rabtiet li fuq is-sit tal-konsorzju tal-ġurnalisti (ICIJ) saret nota biex tgħid li din il-kumpanija tant tirrappreżenta interessi li ma setgħux jagħmlu grafika kif għamlu f’każi oħra bil-għan li kollox ikun spjegat bl-aħjar mod.
Hemm 714 il-kumpanija marbuta ma’ Malta fil-lista ta’ Panama Papers ippubblikata mill-konsorzju internazzjonali tal-ġurnalisti. Il-lista tmur lura għadd ta’ snin. Is-714 kumpanija infetħu minn 49 intermedjarju.
Malta hija t-tmien pajjiż fl-Unjoni Ewropea li l-iktar għandhom persuni fuq din il-lista, bl-iktar pajjiż Ewropew huwa r-Renju Unit. F’Malta hijal-EMD li bi 72 tirrappreżenta l-ikbar numru ta’ interessi. Il-kumpaniji li tagħhhom hija intermedjarju EMD Trust Services huma kollha fil-British Virgin Islands, post meqjus bħala tax haven. EMD huma azzjonisti wkoll fi 12–il kumpanija fil-British Virgin Islands.
Mal-istess kumpanija jagħmel xogħol ta’ konsulenza wkoll Noel Buttigieg Scicluna, esponent ieħor li ngħata biżibilju konsulenzi fi żmien gvernijiet Nazzjonalisti u li gawda bil-kbir fi żmien gvernijiet Nazzjonalisti.
Fi tweġiba mibgħuta dwar is-sehem ta’ EMD f’Panama Papers u l-pożizzjoni tiegħu fil-kumpanija Richard Cachia Caruana kkonferma li hu jagħti konsulenzi lill din il-kumpanija, li hija ta’ oħtu. Fi tweġiba permezz tal-avukat iddefenda lilu nnifsu billi qal li hu jagħmel dan b’rabta ma’ oqsma oħra differenti.
L-avukat qal: “Richard Cachia Caruana m’għandu u qatt ma kellu l-ebda sehem f’kumpaniji rreġistrati fil-Panama, fil-British Virgin Islands jew f’xi tax haven ieħor. Matul il-karriera professjonali kollha tiegħu, Richard Cachia Caruana fl-ebda waqt ma ta pariri dwar il-ftuħ ta’ kumpaniji fil-Panama, fil-British Virgin Islands jew f’xi tax haven ieħor. Richard Cachia Caruana m’għandu u qatt ma kellu l-ebda kunflitti ta’ interess bejn dak li hu proprjetà tiegħu u dak li hu proprjetà tal-Istat. Ir-relazzjoni ta’ Richard Cachia Caruana mad-ditta EMD hija waħda strettament marbuta mal-għoti ta’ pariri lil din id-ditta u lill-klijenti tagħha dwar affarijiet marbuta mal-Unjoni Ewropea u huwa qatt ma kellu l-ebda sehem jew interess finanzjarju fid-ditta u qatt ma kellu r-rwol ta’ direttur jew pożizzjoni ta’ tmexxija fl-istess ditta. L-attentati minn membri tal-istaff tal-Prim Ministru biex jippruvaw jimplikaw rabta bejn Richard Cachia Caruana u l-Panama Papers huma għalhekk totalment qarrieqa.”
