Żagħżugħ ta’ 19-il sena ġie arrestat tul il-lejl li għadda fil-Furjana wara sejba ta’ droga.
Il-każ seħħ għall-ħabta tan-00:30 ta’ dal-lejl, waqt li l-Pulizija mill-Għassa tal-Belt Valletta, kienu qegħdin jagħmlu ronda fi Triq San Franġisk, il-Floriana, innutaw vettura suspettuża.
Għal xi raġuni, ix-xufier tal-vettura saq b’veloċità qawwija iżda wara ftit huwa twaqqaf mill-Pulizija ħdejn il-Park and Ride tal-Blata l-Bajda. Minħabba li x-xufier, żagħżugħ ta’ 19-il sena, beda jaġixxi b’mod suspettuż, il-Pulizija għamlet tfittxija fuq il-persuna tiegħu fejn instab li kellu ammont konsiderevoli ta’ flus kontanti.
Iż-żagħżugħ instab ukoll li kien fil-pussess ta’ madwar 31 qartas li kien fihom sustanza bajda allegatament droga kokaina.
Is-suspettat ġie arrestat u għadu qiegħed jinżamm mill-Pulizija għal iktar stħarriġ.
L-investigazzjonijiet tal-Pulizija għadhom għaddejjin.
