Swieqi United Futsal rebħu l-Enemed Women’s Trophy meta fil-finali li saret fil-Padiljun ta’ San Alwiġi għelbu lil Lija Athletics A 4-1.
Kienet wirja kbira ta’ Swieqi li sa mill-bidu urew is-supremazija tagħhom u minkejja li Lija taw qalbhom ma setgħux jevitaw it-telfa.
Swieqi marru minn fuq wara biss sitt minuti permezz ta’ Danna Fuentes li b’xutt fil-baxx għelbet lil Daniela Mativa.
Għoxrin sekonda minn tmiem l-ewwel taqsima, Lija kellhom ċans tad-deheb li jġibu l-iskor indaqs meta ngħataw penalty iżda Ruth Steer Cheetham rat ix-xutt tagħha milqugħ mill-goalkeeper brava Christiana Pisani.
Fit-tieni taqsima, Swieqi baqgħu konsistenti u reġgħet kienet Danna Fuentes li għaqqdet doppjetta personali fil-31 minuta sabiex għaxar minuti wara, Andjela Kricak mill-viċin għamlithom 3-0.
Lija dehru mifxula u fit-43 minuta huma qalgħu r-raba’ gowl wara foul li ngħata minn Amy Abdilla li ssoprenda lil Mativa.
Proprju ftit sekondi minn tmiem il-konfront, Lija naqqsu l-marġni tal-iskor permezz ta’ Ylenia Azzopardi.
Fi tmiem il-konfront kien evidenti l-ferħ tal-plejers ta’ Swieqi meta r-rappreżentanta mill-kumpanija Enemed Brenda Refalo ippreżentat it-tazza lill-captain Krista Montfort.
