L-inizjattiva Sports Unity li għandha l-għan li tgħaqqad flimkien dawk kollha involuti fl-isport Malti għal għanijiet ta’ solidarjeta’ kisbet l-ewwel suċċess tagħha meta partitarji minn sitt klabbs tal-Premier taw id-demm flimkien fiċ-Ċentru tal-Għoti tad-Demm f’Gwardamanġia.
Organizzata fl-okkażjoni tal-ewwel logħba tal-kampjonat il-ġdid tal-Premier li ngħata bidu fi tmiem il-ġimgħa, l-ewwel avveniment kellu l-għan li juri s-saħħa tas-solidarjeta’ fl-isport. Partitarji lebsin kuluri differenti tat-timijiet tagħhom ingħaqdu flimkien għal kawża ġusta li tista’ ssalva numru ta’ ħajjiet.
Dan l-avveniment kellu l-għan li jservi wkoll tal-ewwel tarġa lejn oġġettiv ferm akbar ta’ Sports Unity għal din is-sena, li l-klabbs tal-Premier u ċ-Challenge League jingħaqdu flimkien biex jiġbru l-fondi għar-riċerka dwar il-kanċer, b’appoġġ għall-RIDT, il-fond ta’ riċerka tal-Universita.
Ian Debattista, Chairman ta’ Hamrun Hanin, l-għaqda volontarja wara Sports Unity qal: “Dan l-avveniment kien prova ċara ta’ kif fl-għaqda hemm is-saħħa, anke barra l-grawnd. Meta persuni minn sfondi differenti jingħaqdu flimkien għal kawża akbar, ir-riżultati huma kbar. Li nara tant partitarji bil-flokkijiet tat-tim rispettivi jingħaqdu flimkien kien ta’ inkoraġġiment biex nimxu ‘l quddiem b’din l-inizjattiva tagħna”.
Is-COO ta’ 360Sports, Richard Shirley qal: “360Sports hija ferm kuntenta li tappoġġja dan l-avveniment ta’ għoti tad-demm fil-bidu tal-istaġun, organizzat minn Sports Unity. Aħna nappoġġjaw inizjattivi tal-partitarji Maltin b’passjoni kbira u nħarsu ‘l quddiem li nieħdu sehem f’inizjattivi oħra matul dan l-istaġun”.
Caroline Cassar, f’isem l-NBTS qalet: “Iċ-Ċentru Nazzjonali għat-Trasfużjoni tad-Demm jixtieq jirringrazzja lil Sports Unity għal dan l-ewwel avveniment eċitanti li għaqqad membri u partitarji biex jagħtu d-demm u jsalvaw il-ħajjiet. Fejn hemm l-għaqda, hemm is-saħħa u jistgħu jsiru kisbiet kbar. B’għotja waħda tad-demm tista’ ssalva tliet ħajjiet. B’donazzjoni kull erba’ xhur (mara) u kull tliet xhur (ragel) wieħed jista’ jsalva bejn 9 u 12-il ħajja fis-sena.
Ritratt: Henry Zammit Cordina
