L-artisti ta’ fama internazzjonali li t-Tlieta filgħaxija pparteċipaw fil-ħdax –il edizzjoni tal-Isle of MTV ma ddiżappuntawx.
Il-grinta fuq wiċċ l-ikoni tal-mużika li għal lejla sħiħa ferrħu lill-madwar ħamsin elf Malti u turist li ħonqu l-Fosos tal-Furjana, kienet trasferita fil-folla li żifnet u kantat mad-daqqa tal-mużika b’ġeneri differenti u bi stili li laqtu l-gosti ta’ kulħadd.
Id-diskors ta’ kemm l-artisti tal-lum ma jiswew xejn fejn dawk ta’ snin oħra sfuma fix-xejn, meta minn kmieni wara nofsinhar, bosta żgħażagħ bdew jinġabru fuq il-Fosos.
Għalkemm l-Isle of MTV ma jattirax żgħażagħ biss, iżda persuni ta’ kull età.
RAYE, Jonas Blue, DNCE u Chainsmokers ilkoll taw prestazzjonijiet mill-aqwa, għalkemm kien hemm mumenti fejn il-folla wieġbet aktar minn oħrajn.
Intlaqgħet bil-kbir l-interpretazzjoni tad-diska You Don’t Know Me minn RAYE.
Il-kantant Ingliż Jonas Blue kanta numru ta’ diski li tant huwa magħruf għalihom, bħal Mama, Perfect Strangers u By Your Side, iżda l-aktar mument li spikka kien meta ħareġ fuq il-palk majestuż ixejjer il-bandiera Maltija.
DNCE wkoll intlaqgħu b’entużjażmu mill-folla; speċjalment għad-diski Kissing Strangers u Cake By The Ocean.
Għalqu l-Isle of MTV Chainsmokers, li deher biċ-ċar li kienu l-aktar popolari mal-udjenza preżenti, b’mod partikolari dawk żgħar fl-età.
Ftit qabel rifsu fuq il-palk l-artisti internazzjonali, fetħu din il-festa ta’ mużika diversi artisti lokali; fosthom il-band Għawdxija The Travellers, u l-kantanta Christabelle.
Intant, is-suċċess tal-Isle of MTV f’Malta se jkompli jikber fil-jiem li ġejjin, b’xandiriet speċjali tal-Festival jintwerew f’kull rokna tad-dinja permezz tal-istazzjonijiet tal-MTV.
Ritratti: Kimberley Portelli
