Studju li sar dan l-aħħar stabbilixxa x’għandu jkun id-dħul adegwat għal għajxien diċenti f’Malta.
Dan l-istudju, bit-titlu, “A Proposal Towards the Definition and Estimates of the National Living Income in Malta 2022”, kien frott ta’ ħidma flimkien bejn il-General Workers’ Union, il-Moviment Graffitti, u l-Alleanza Kontra l-Faqar.
L-istudju stħarreġ id-dħul ta’ sitt kategoriji differenti ta’ familji f’Malta u wasal għall-konklużjoni li għandu jkun ta’ madwar €14,864 għal persuna waħedha bla tfal, €20,099 għal ġenitur waħdu b’wild wieħed, €26,018 għal ġenitur waħdu b’żewġt itfal, €21,316 għal koppja bla tfal, €25,746 għal żewġ ġenituri b’wild wieħed, u €30,734 għal żewġ ġenituri b’żewġt itfal.
Dan l-istudju ħa diversi xhur biex sar u fih ġew intervistati ’l fuq minn 1,000 persuna. Minbarra intervisti fuq bażi individwali, saru wkoll diversi gruppi tematiċi. Ġie kofinanzjat bi tmenin fil-mija mill-Fondi Strutturali tal-Unjoni Ewropea u b’għoxrin fil-mija mħallsa mill-GWU.
Fi preżentazzjoni li għamel tal-istudju, Jake Azzopardi minn Re-Think Advisory Group, stqarr li din ir-riċerka tat kas ta’ diversi fatturi fosthom is-saħħa, l-ikel u x-xorb, l-akkomodazzjoni, l-edukazzjoni, it-trasport, u r-rikreazzjoni, fost affarijiet oħra.
Qal, “Ma limitajniex ruħna għal kategorija ta’ income partikolari waħda, u lanqas ma llimitajna għal household partikolari, imma t-tipi kollha li hawn f’pajjiżna u wkoll kategoriji differenti ta’ income li jagħmlu l-ispektrum ta’ households Maltin.”
Is-Segretarju Ġenerali tal-GWU Josef Bugeja fisser dan l-istudju bħala l-ewwel pass biex nersqu lejn sitwazzjoni fejn kulħadd ikollu dħul diċenti.
Qal, “Wieħed mill-pilastri ewlenini tal-GWU huwa l-ġustizzja soċjali, u dejjem kellna l-ħsieb li nagħmlu diskussjoni dwar dak li nsejħulu national living income. Id-diskussjoni ma kinitx fuq il-living income biss imma fuq id-dħul li għandu jkollu persUna biex ikollha hajja diċenti.”
