Proġett li jippreżenta l-kunċett ta’ MCAST Partner School, se jkun qed jagħti lok li permezz tiegħu l-Kulleġġ San Benedittu se jidħol f’kollaborazzjoni mal-MCAST sabiex jipprovdi programmi ġodda ta’ VET (Edukazzjoni u Taħriġ Vokazzjonali) lill-istudenti tal-iskola sekondarja fil-qasam tal-Inġinerija u/jew tat-Teknoloġija.
S’issa l-programmi tal-VET, fl-iskejjel kienu jwasslu biss għaċ-ċertifikazzjoni taċ-ĊES maħruġ mill-Università ta’ Malta. Din se tkun iċ-ċavetta li tintroduċi iktar VET modules fl-iskejjel sekondarji. Dawk l-istudenti li jtemmu b’suċċess dawn il-modules, se jingħataw akkreditazzjoni ta’ Diploma f’livell 3 maħruġ mill-MCAST qabel ma jtemmu l-edukazzjoni obbligitarja. Dan bl-intenzjoni li eventwalment, dan l-inpenn jinfirexx fuq livell nazzjonali.
L-iskop ewlieni ta’ din l-inizjattiva hu sabiex jissaħħu l-programmi tal-VET fl-iskejjel sekondarji u tagħti l-possibiltà lill-istudennti li jtemmu l-iskola obbligatorja b’ċertifikazzjoni akkreditat. L-istudenti fl-isturdju tal-VET jkunu jistgħu jkomplu l-istudju tagħhom direttament f’livelli ogħola fl-MCAST jew inkella jkunu jistgħu jidħlu fid-dinja tax-xogħol mħarrġa, bl-għodda mogħtija lilhom skont in-New Skills Agenda 2020.
L-industrija lokali hija waħda importanti f;dan il-proġett. Hu importanti li nisimgħu u ninkludu dak li għandha x’tgħidilna. Dan se jgħin sabiex jinbena djalogu u pont bejn dak li toffri l-edukazzjoni u dak li toffri r-realtà tad-dinja tax-xogħol u l-ħtiġijiet tagħha.
Għalliema tas-suġġetti relatati mal-istudju tal- Vokazzjoni tat-Teknoloġija u tal-Inġinerija flimkien mat-tuturi tal-MCAST, se jkunu qed jaħdmu id f’id sabiex jaddattaw u jiżviluppaw il-kontenut tas-suġġett tal-VET għall-abbiltajiet tal-istudenti ta’ skejjel sekondarji. Dan se jinkludi l-informazzjoni u l-abbiltajiet diskussi ma’ l-industrija fl-istess qasam.
L-industrija lokali se tkun qiegħda toffri riżorsi umani kif ukoll fiżiċi sabiex ladarba jibda t-tagħlim, ikun jista’ jseħħ anke fuq il-post tax-xogħol.
Huwa mistenni li mis-sena 2020, il-Kulleġġ San Benedittu se jkun qed jgħaqqad grupp ta’ madwar 25 student sabiex jitħarrġu fit-Teknoloġija u fl-Inġinerija u jiġu ċċertifikati għat-tielet livell ta’ Diploma kompluta fl-aħħar tal-iskola sekondarja.
