Fi stqarrija il-Partit Laburista qal li l-fatt li l-istqarrija tal-Partit Nazzjonalista llejla dwar is-Central Link Project hija ffirmata minn tliet deputati membri tal-aħħar Gvern Nazzjonalista jagħmilha waħda mingħajr ebda kredibbiltà.
“David Agius, Jason Azzopardi u Edwin Vassallo kienu lkoll parti mill-gvern li ried Central Link Project b’effett ikbar fuq l-ambjent” stqarr il-Partit Laburista.
Kienu wkoll parti mill-Gvern li wassal għall-ikbar qerda ambjentali fl-istorja meta estenda ż-żoni ta’ żvilupp.
Il-proġett tas-Central Link, kif propost illum, huwa ambjentalment iktar sostenibbli għax naqqas l-art agrikola użata u iktar minn hekk fi tmiem tiegħu se jkun hemm iktar siġar milli hemm illum. Dan fl-istess ħin li jitnaqqas it-traffiku u għalhekk jonqsu wkoll l-emmissjonijiet.
Il-Partit Laburista fakkar li mhux se jintmessu lanqas is-siġar fit-tela’ tas-Saqqajja kif kien hemm min prova jagħti l-impressjoni. Ironikament l-aħħar wieħed li ried jaqla’ s-siġar f’dik iż-żona huwa wkoll firmatarju tal-istess stqarrija. Dan għax sakemm inqabad Toni Bezzina ried jaqla’ s-siġar biex jibni villa għalih.
“Ara kif jista’ jittieħed bis-serjetà!”, temmet tgiħid l-istqarrija tal-Partit Laburista.
