Stħarriġ tal-opinjoni pubblika ta’ Dr Vincent Marmarà ippubblikat fuq it-Torċa u ieħor fuq il-Maltatoday taw prattikament riżultat identitiku ta’ fiduċja b’saħħitha fil-Prim Ministru Robert Abela u l-Partit Laburista.
Filwaqt li l-istħarriġ tat-Torċa ta fiduċja ta’ 52.5% fil-Prim Ministru, 25.5% iżjed mill-Kap tal-Oppożizzjoni Bernard Grech, dak tal-Maltatoday wera fiduċja b’saħħitha oħra ta’ kważi 49% fil-Mexxej Laburista, 21% iżjed mill-Kap Nazzjonalista.
Meta niġu għall-partiti politiċi ewlenin f’pajjiżna, kemm it-Torċa u l-Maltatoday irrappurtaw distakk ta’ madwar 46,000 vot bejn il-Partit Laburista u l-Partit Nazzjonalista, b’tal-ewwel fdat minn kważi 57% tal-elettorat u l-Partit Nazzjonalista jikseb ftit inqas minn 42%, skont it-Torċa, filwaqt li skont il-Maltatoday, li kieku kellha ssir elezzjoni għada, il-Partit Laburista jgħaddi lill-Partit Nazzjonalista bi 13.5 punti perċentwali.
Dan huwa qrib id-distakk tat-Torċa li juri 15% differenza bejn il-Partit Laburista u l-Partit Nazzjonalista.
Intant l-istħarriġ tat-Torċa, li bħall-ieħor sar wara l-Budget u d-diskorsi taż-żewġ mexxejja fil-Parlament, jgħid li l-fiduċja fil-Mexxej Laburista hija ferm iżjed b’saħħitha fost il-votanti Laburisti fl-2017 milli hi l-fiduċja tal-votanti Nazzjonalisti fl-2017, fil-Kap Nazzjonalista.
Fil-fatt fl-istħarriġ li sar fost 750 persuna, 87.2% ta’ dawk li vvutaw lill-Partit Laburista fl-aħħar elezzjoni ġenerali, qalu li jafdaw f’Dr Abela filwaqt li huma inqas minn tliet kwarti ta’ dawk li vvutaw lill-Partit Nazzjonalista fl-aħħar elezzjoni ġenerali, li jafdaw f’Grech.
L-istħarriġ ta’ Marmarà jinnota wkoll żieda ta’ fiduċja fil-Partit Laburista ta’ 1.7% u tnaqqis ta’ 2% għall-Partit Nazzjonalista, fuq ir-riżultat tal-aħħar elezzjoni ġenerali.
Intant skont l-istħarriġ tal-Maltatoday, aktar minn 90% tal-votanti Laburisti fl-aħħar elezzjoni ġenerali jafdaw f’Robert Abela filwaqt li huma inqas minn 68% li vvutaw lill-Partit Nazzjonalista fl-aħħar elezzjoni ġenerali li jafdaw lil Kap attwali tal-Partit Nazzjonalista.
L-istħarriġ tal-Maltatoday juri li l-Prim Ministru jgawdi fiduċja fuq il-Kap tal-Oppożizzjoni fost il-kategoriji kollha t’età.
Fost dik l-aktar żagħżugħa, jiġifieri dawk li jgħoddu bejn is-16 u l-35 sena, Dr Abela jgħaddi lil Grech b’26%, fejn il-Mexxej Laburista jġib kważi 41% u Grech jikseb inqas minn 15%.
Dr Abela l-aktar li jikseb fiduċja fost dawk li jgħoddu bejn 51 u 65 sena (58.6%) u l-kategorija ta’ pensjonanti, jiġifieri ’l fuq minn 65 sena (50.1%).
Il-Partit Laburista wkoll jikseb iżjed fiduċja mill-Partit Nazzjonalista f’kull kategorgija t’età u l-istħarriġ jinnota li filwaqt li l-Partit Laburista prattikament żamm il-votanti tiegħu li vvutawlu fl-aħħar elezzjoni ġenerali, il-Partit Nazzjonalista tilef kważi 3% tal-votanti tiegħu li vvutawlu meta kien hemm Simon Busuttil Kap.
