Il-President tal-Kummissjoni Ewropea Ursula von der Leyen innutat ir-riformi favur it-tisħiħ tas-saltna tad-dritt li għamlet Malta.
Hija għamlet dan fid-diskors annwali tagħha fil-Parlament Ewropew, magħruf bħala State of the Union.
Fi Strasburgu kienu bosta t-temi li Von der Leyen għażlet li tindirizza f’diskors ta’ madwar siegħa.
Fost dawn kien hemm dak dwar is-Saltna tad-Dritt u dlonk irreferit għal Malta.
Qalet, “L-istat tad-dritt jista’ jinkiseb u jkun protett tar-riformi u dawn huma parti minn dan il-proċess. Per eżempju r-riformi ġudizzjarji f’Malta jew inkella r-riformi li saru fis-Slovakkja.”
Fuq l-istess tema rreferiet ukoll għall-importanza tal-ġurnaliżmu u l-midja f’Unjoni Ewropea demokratika u tenniet li fiż-żmien li ġej se jsiru rakkomandazzjonijiet għall-protezzjoni tal-ġurnalisti u l-midja.
Hawnhekk semmiet il-qtil ta’ ġurnalisti fosthom Daphne Caruana Galizia u s-Slovakk Ján Kuciak.
Tema ewlenija oħra li Ursula von der Leyen għażlet li titkellem fuqha kienet dik tal-irkupru mill-pandemija.
Spjegat kif 70% tal-poplu adult fl-Unjoni Ewropea huwa mlaqqam u dan juri l-ispeditezza tal-ħidma li saret sabiex jiġi mmanifatturat u mqassam il-vaċċin.
Hija ħabbret li fil-fatt l-Unjoni Ewropea se tkun qed tagħmel donazzjoni oħra ta’ 200 miljun doża tal-vaċċin flimkien ma’ 250 miljun oħra mwiegħda lill-pajjiżi vulnerabbli sa nofs is-sena d-dieħla.
Dwar il-ġlieda kontra t-tibdil fil-Klima, il-President tal-Kummissjoni Ewropea kwotat ir-rapport tal-Panel bejn Gvernijiet differenti dwar it-tibdil fil-klima, li ħareġ ftit tal-ġimgħat ilu hekk kif sostniet li din ir-realtà hija problema li ħloqna aħna u li rridu niġġielduha akkost ta’ kollox.
Von der Leyen semmiet il-miri ta’ tnaqqis ta’ 55% f’emmissjonijiet tal-karbonju li ġew stabbiliti s-sena li għaddiet.
Spjegat, “L-Ewropa tista’ tagħmel ħafna u nistgħu nappoġġjaw lill-oħrajn. Jien kburija li llum nista’ nħabbar li l-Unjoni Ewropea ser tirdoppja l-finanzjarjament estern għall-bijodiversità, speċjalment għall-iktar pajjiżi dgħajfa. Iżda l-Ewropa dan ma tistax tagħmlu waħidha. Il-COP26 fi Glasgow se jkun mument ta’ verità għall-komunità globali.”
Von der Leyen tenniet ukoll li se jiġu proposti €4 biljun għall-finanzjament tal-klima sal-2027.
Dwar il-qasam diġitali, il-President tal-Kummissjoni Ewropea tenniet ukoll li se jkompli jsir investiment fil-ħiliet diġitali.
Hija ħabbret ukoll programm bl-isem ALMA mmirat propju għaż-żgħażagħ li permezz tiegħu se jkunu jistgħu jġibu esperjenza fid-dinja tax-xogħol fi stati membri Ewropej differenti.
Il-President tal-Kummissjoni Ewropea rreferiet ukoll għas-suġġett tal-immigrazzjoni fid-diskors tagħha hekk kif tenniet li hemm bżonn ta’ pożizzjoni komuni fuq is-suġġett.
Il-ġurnalist ta’ ONE News, Samuel Lucas, spjega kif “Finalment ma kienx jonqos li Ursula von der Leyen tinnota l-aħħar żviluppi li feġġew fl-Afganistan. Hawnhekk hija sostniet li l-Ewropa ser tibqa’ sservi ta’ spalla għall-poplu Afgan. Fost affarijiet oħra Ursula von der Leyen ħabbret ser jiżdied l-fondi tal-għajnuna umanitarja b’€100 miljun ewro bħala parti minn pakkett t’għajnuna għall-Afganistan. Fl-istess waqt ħabbret li dwar dan, sal-aħħar tas-sena, se jkun hemm dikjarazzjoni konġunta bejn l-Unjoni Ewropea u n-NATO.
