L-Unjoni Ewropea se tkompli taħdem biex, fix-xitwa li ġejja, l-Ewropa jkollha biżżejjed provvista ta’ gass għall-enerġija. Dan għandu jiżgura li l-familji Ewropej ikollhom biex isaħħnu djarhom matul ix-xhur kesħin.
Dan l-impenn esprimietu l-President tal-Kummissjoni Ewropea, Ursula von der Leyen, waqt id-diskors annwali tal-Istat tal-Unjoni, fil-Parlament Ewropew fi Strasburgu.
Hija semmiet li bħalissa l-pajjiżi tal-Unjoni Ewropea għandom riserva tal-gass ta’ 84 fil-mija, li qabeż dak maqbul bejn l-Istati membri. Saħqet, iżda, li dan għadu mhux biżżejjed.
Fil-fatt, 9 fil-mija tal-gass fl-Ewropa għadu ġej mir-Russja. Dan il-perċentwal naqas sew f’dawn l-aħħar ġimgħat, għax fil-bidu tal-gwerra kien 40 fil-mija.
Von der Leyen qalet li l-Unjoni Ewropea qed tħares lejn sorsi ġodda ta’ enerġija, fosthom l-Istati Uniti, in-Norveġja, u l-Alġerija.
Il-President tal-Kummissjoni Ewropea pproponiet limitu fuq id-dħul tal-kumpaniji li jipproduċu l-enerġija bi spejjeż baxxi. Qalet li dawn il-profitti għandhom igawdu minnhom il-konsumaturi Ewropej, li bħalissa qed iħallsu kontijiet tad-dawl għoljin ħafna.
Barra minn hekk, semmiet l-inizjattiva ‘Niffrankaw il-Gass għal Xitwa Sigura’, maħsuba biex ikun hemm tnaqqis tal-użu tal-enerġija fis-sigħat meta l-aktar li tintuża.
Qalet li bħalissa, fi ħdan l-istituzzjonijiet Ewropej, għaddejja d-diskussjoni dwar limitu massimu fil-prezz tal-gass.
Von der Leyen semmiet ukoll li se jkun hemm iżjed investiment – ta’ €3 biljun – fuq l-idroġenu u anki l-ħolqien tal-Bank Ewropew tal-Idroġenu.
Fid-diskors tal-Istat tal-Unjoni, il-President tal-Kummissjoni Ewropea qalet ukoll li l-Unjoni Ewropea trid turi s-solidarjetà tagħha fil-qasam tal-immigrazzjoni, bħalma ġara mal-poplu Ukren.
“But this determination and drive for solidarity is still missing in our migration debate. Our actions towards Ukrainian refugees must not be an exception. They can be our blueprint for going forward. We need fair and quick procedures, a system that is crisis proof and quick to deploy, and a permanent and legally binding mechanism that ensures solidarity. And at the same time, we need effective control of our external borders, in line with the respect of fundamental rights.”
Il-President tal-Kummissjoni Ewropea, Ursula von der Leyen
Von der Leyen qalet li, f’dan il-mument ta’ sfidi, l-Ewropa qatt ma kienet iżjed magħquda.
“This is not only a war unleashed by Russia against Ukraine. This is a war on our energy, a war on our economy, a war on our values and a war on our future. This is about autocracy against democracy. And I stand here with the conviction that with courage and solidarity, Putin will fail and Europe will prevail.”
Il-President tal-Kummissjoni Ewropea, Ursula von der Leyen
Hawnhekk, il-President tal-Kummissjoni Ewropea qalet li l-Unjoni Ewropea se tibqa’ tkun ta’ spalla għall-poplu Ukren.
Qalet ukoll li s-sanzjonijiet kontra r-Russja se jkomplu u li issa qed jidher ċar li dawn is-sanzjonijiet qed iħallu impatt fuq il-Kremlin. L-industrija fir-Russja tinsab f’qagħda kritika, u l-istess is-settur finanzjarju Russu.
Intqal li minn Frar lil hawn, minħabba s-sanzjonijiet, telqu madwar elf kumpanija mir-Russja.
Il-President tal-Kummissjoni Ewropea ħabbret li l-Unjoni Ewropea se tagħti €100 miljun sabiex jintranġaw mill-ġdid l-iskejjel fl-Ukrajna wara li l-gwerra f’dan il-pajjiż qerdet madwar 70 skola.
Il-President tal-Kummissjoni Ewropea ħabbret ukoll li l-Unjoni Ewropea se tixtri għaxar inġenji tal-ajru u tliet ħelikopters sabiex tiġġieled in-nirien qawwija li l-Ewropa qed taffaċċja fix-xhur tas-sajf.
Dwar l-ekonomija, hija semmiet li mill-Pjan ta’ Rkupru u Reżistenza ngħataw biss €100 biljun. Hawnhekk saħqet li għad baqa’ €700 biljun biljun oħrajn x’jingħataw lill-Istati membri tal-Unjoni Ewropea, biex tkun żġurata s-sostenibbilita.
Von der Leyen ipproponiet li s-sena d-dieħla tkun is-sena tal-eduzzjoni u t-taħriġ, biex aktar ċittadini jkunu mħarrġa sew.
Qalet ukoll li se tkun qed tressaq miżuri leġiżlattivi sabiex l-Unjoni Ewropea tiġġieled il-korruzzjoni.
Semmiet li l-Unjoni Ewropea trid taħdem favur is-saħħa mentali u biex jiġi assiġġurat li dan isir b’mod aċċessibbli għal kulħadd.
Dwar il-futur tal-Ewropa, il-President tal-Kummissjoni Ewropea qalet li temmen li wasal iż-żmien li titlaqqa’ l-Konvenzjoni Ewropea u anki li tinħoloq il-Komunita Politika Ewropea, li tagħti l-ideat lill-Kunsill Ewropew.
Fid-diskors tagħha, il-President tal-Kummissjoni Ewropea sellmet il-memorja tar-Reġina Eliżabetta t-Tieni u anki tal-eks President tal-Parlament Ewropew, David Sassoli.
