Splużjoni fuq vapur Grieg li jtajjar il-bandiera Maltija ma darbet lil ħadd hekk kif il-bastiment kien se jitlaq mill-port ta’ Al Shuqaiq fil-Baħar l-Aħmar, fl-Arabja Sawdija.
L-aġenzija t’aħbarijiet Al Arabiya rrappurtat li dan seta’ kien attakk terroristiku minn bomba fil-baħar li laqtet il-vapur.
It-tanker Agrari sofra ħsarat minimi f’parti ftit ‘il fuq mill-ilma iżda ma kkawża l-ebda ħruġ ta’ żejt fil-baħar.
Abbord il-bastiment kien hemm ħamsa u għoxrin membru tal-ekwipaġġ fosthom seba’ Griegi.
L-Arabja Sawdija qed tissuspetta li dan kien attakk minn ribelli fil-Jemen li huma appoġġjati mill-Iran.
Il-Baħar l-Aħmar huwa rotta importanti għall-kummerċ u r-ribelli Houthi fil-Jemen ta’ spiss jattakkaw dak kollu li għandu x’jaqsam mar-Renju tal-Arabja Sawdija.
