Sparky l-kelb tad-Dwana qabad ammont ta’ sustanzi illeċiti minn fuq żewġt irġiel Ingliżi fl-Ajruport Internazzjonali ta’ Malta.
Fi stqarrija d-Dipartiment tad-Dwana qal li li wara talba għall-għajnuna mill-kamra tal-kontroll tal-Ajruport stess, uffiċjali tad-Dwana għamlu tfittxija fuq għaxar Ingliżi li kuenu għadhom kif waslu Malta minn Leeds.
Id-Dwana spjegat ukoll li waqt tfittxijiet fil-bagalji tal-passiġġiera, Sparky l-kelb wera interess partikolari f’żewġ passiġġera li rriżulta li kellhom xi sustanzi fuqhom. L-ewwel passiġġier kellu fuqu basket tal-plastik b’sustanza suspettata kokaina, u żewġ pakketti oħra b’pilloli suspettati Ecstasy.
It-tieni passiġġier mbagħad kellu fuqu għodda relatata mal-użu tad-droga u pakkett b’sustanza suspettata kannabis.
Il-każ issa ingħadda lill-Pulizija għal aktar investigazzjonijiet.
