Spanjol li jbiegħ il-ħaxix u l-frott jista’ jkun li jingħata sentenza ta’ ħabs, wara li ammetta li pprova jġorr armi u munizzjon fl-ajruport.
Fil-Qorti, Ruben Cuervo Fernandez minn Gijon, ammetta li kien qed iġorr skieken, pepper spray, armi tan-nar u munizzjoni fil-bagalja qabel ma kien se jitlaq minn Malta.
L-Ispettur Roxanne Tabone, li kienet qed tmexxi l-Prosekuzzjoni qalet li l-imputat ammetta li għamel żball għaliex qatt ma basar li dawn l-oġġetti kienu illegali f’Malta.
Sostna li huwa ngħata dawn l-oġġetti bħala rigal u għadda bihom minn diversi ajruporti internazzjonali fosthom dak ta’ Berlin.
Min-naħa tiegħu, l-Avukat Difensur Simon Micallef Stafrace qal li l-akkużat xtara s-skieken għax-xogħol.
Wara li semgħet dawn is-sottomissjonijiet, il-Qorti li kienet ippreseduta mill-Maġistrat Donatella Frendo Dimech, iddeċidiet li tagħti s-sentenza l-ġimgħa d-dieħla.
