Kienet partita mingħajr storja dik li rat lil Sliema Wanderers jegħlbu lil Gudja United bl-iskor kbir ta’ 6-0, f’liema partita huma kienu diġá aċċertati mit-tliet punti sa tmiem l-ewwel taqsima, hekk kif diġá kienu erba’ goals minn fuq.
Permezz ta’ din ir-rebħa huma aċċertaw ruħhom mit-tielet post u b’hekk post fl-Ewropa, fejn l-aħħar li rnexxielhom jagħmlu dan kien lura fl-istaġun 2013 / 2014.
Ta’ nota huwa l-fatt li dan il-konfront irrapreżenta konfront bejn il-missier u l-iben – il-kowċ ta’ Sliema Wanderers Paul Zammit u l-player ta’ Gudja United, Gianluca Zammit.
Kienu Sliema li ħolqu l-ewwel periklu fid-disa’ minuta meta Mohamed Awad kellu x- xutt tiegħu devjat f’corner minn difensur avversarju. Huma komplew fuq l-offensiva u tliet minuti wara rebħu penalty meta James Arthur twaqqa’ fil-kaxxa minn player ta’ Gudja. Mill-11-il metru inkargia ruħu SAMUEL GOMES DA MATA li ma żbalajx hekk kif permezz ta’ xutt b’saħħtu tefa’ l-ballun fir-rokna tax-xibka.
Fl-14-il minuta irduppjaw l-iskor meta MOHAMED AWAD minn taħt il-lasta u b’logħob tat-tfal tefa’ ġewwa.
Kulma jmur kompliet ix-xalata ta’ goals tal-Wanderers u ħames miuti wara, għamluhom tlieta, meta wara li rċieva minn azzjoni ta’ corner, JOSEPH MINALA, kien fil-post it-tajjeb fil-mument opportun u permezz ta’ daqqa ta’ ras preċiża tefa’ l-ballun wara l-goalkeeper ta’ Gudja, Justin Spiteri.
Gudja wieġbu għall-ewwel darba fid-29 minuta meta Shaisen Attard kellu xutt mid-distanza li ntemm għoli.
Sliema reġgħu ħolqu l-periklu fl-40 minuta meta Samuel Gomes Da Mata kellu l-konklużjoni tiegħu minn ġol-kaxxa tintemm ftit barra. Huma komplew jipproduċu l-isbaħ logħob u erba’ minuti wara James Arthur kellu x-xutt tiegħu mid-distanza li ħareġ l-aħjar ta’ Justin Spiteri li dawwar f’corner bi bravura.
Azzjoni wara l-oħra is-Slimiżi skorjaw ir-raba’ goal fil-45 minuta eżattament qabel tmiem l-ewwel taqsima meta Mohamed Awad ipprovda l-assist lill-iskorer prolifiku Sloven VITO PLUT li mill-viċin tefa’ ġewwa.
Fil-ftuħ tat-tieni taqsima, Sliema komplew bl-istess ritmu tal-ewwel waħda u fil-50 minuta rebħu penalty mera Rodrigue Nanitelamio waqqa’ lil Vito Plut fil-kaxxa. Mill-11-il metru inkariga ruħu MYLES BEERMAN li ma żbalajx hekk kif permezz ta’ xutt fil-baxx tefa’ l-ballun naħa u lil Spiteri n-naħa opposta.
Il-goals għas-Slimiżi ma ridux jieqfu u fis-57 minuta għamluhom sitta meta Mohamed Awad serva fuq platt tal-fidda lil GEOFFREY EDWIN ACHEAMPONG li minn pożizzjoni ideali, ma ħafirx.
Bir-rebħa tkun ilha assigurata, Sliema Wanderers naqsu ftit mir-rendiment tagħhom, bil-partita tkompli kkaratterizzata minn ħafna logħob f’nofs il-ground, bis-Slimiżi ikomplu jamministraw il-vantaġġ komdu li kellhom sa tmiem il-partita.
Referee: Darryl Agius
BOV Plejer tal-Logħba: Geoffrey Edwin Acheampong (Sliema W.)
