F’partita li pproduċiet xejn inqas minn erba’ goals, Sliema salvaw punt prezzjuż fi draw ta’ 2-2 kontra Melita.
Kienu Sliema li ħolqu l-ewwel periklu fit-tmien minuta meta daqqa ta’ ras mill-viċin ta’ Vito Plut għaddiet ftit barra.
Huma komplew jiddettaw il-logħob u fit-22 minuta, Adam Magri Overened kellu x-xutt tiegħu minn ġol-kaxxa mxellef f’corner minn difensur avversarju. Mill-corner li rriżulta sekondi biss wara mogħti minn Steve Pisani, Simon Zibo kellu d-daqqa ta’ ras tiegħu minn taħt il-lasta devjata f’corner ieħor minn difensur ta’ Melita.
Iżda man-nofsiegħa logħob Sliema qalgħu daqqa ta’ ħarta meta tkeċċa għalihom permezz ta’ karta ħamra diretta il-player Myles Beerman wara daħla kerha fuq il-captain ta’ Melita, Jean Pierre Attard.
Madankolu, il-Wanderers fetħu l-iskor erba’ minuti biss wara meta Steve Pisani indirizza cross pinġut fid-direzzjoni ta’ SAMUEL GOMES DA MATA li permezz ta’ daqqa ta’ ras preċiża tefa’ l-ballun wara l-goalkeeper ta’ Melita, Gosef Mizzi.
Melita wettqu reazzjoni tajba u fit-42 minuta Matthew Debattista ġie wiċċ imb’wiċċ mal-goalkeeper tal-Wanderers Kelvin Emeka Agu li dawwar tajjeb f’corner, biex salva goal ċert.
Fil-ftuħ tat-tieni taqsima Melita ħarġu ferm aggressivi u ta’ dan ġew ippremjati meta fit-48 minuta Andre Pena da Costa serva fuq platt tal-fidda lil NICK CUTAJAR li permezz ta’ xutt mill-ewwel tefa’ l-ballun fir-rokna tax-xibka.
Huma qalbu l-iskor favurihom żewg minuti biss wara meta Karl Mohnani għadda tajjeb lejn ANDRE PENA DA COSTA li b’eleganza u b’lob preċiż qabbeż il-ballun minn fuq Emeka Agu.
Il-pressjoni kienet kollha fuq Sliema u fit-58 minuta, Vito Plut minn pożizzjoni ideali u b’xutt bid-dawra kellu l-konklużjoni tiegħu tintemm ftit għoli.
Huma komplew fuq l-offensiva u fil-65 minuta kienu ferm sfortunati li ma ġabux l-iskor indaqs meta minn corner tas-solitu Steve Pisani, l-ewwel Vito Plut u mbagħad Simon Zibo kellhom il-konklużjoni bir-ras tagħhom tistampa mal-wieqfa, b’Melita jeħilsuha ħafif.
Fit-78 minuta Sliema Wanderers appellaw għall-penalty meta Karl Mohnani deher imiss il-ballun b’idu fil-kaxxa fost protesti min-naħa tal-players, partitaji u diriġenti tal-Wanderers fejn fost oħrajn tkeċċa minn fuq il-bank permzz ta’ karta ħamra diretta, it-team manager tal-Wanderers, Alex Muscat.
U meta l-konfront kien misteni li jmur favur Melita, fil-ħin miżjud Silema rebħu penalty meta Henrique Motta waqqa’ lill-Jonata De Oliveira Bastos fil-kaxxa. Mill-11-il metru inkariga ruħu il-captain HENRIQUE MURILLO li ma żbaljax.
Referee: Daniel Portelli
Player tal-Logħba: Gustavo Alchino
